ചര്‍ച്ചിന്റെ തിണ്ണയിലിരുന്നു; മാനസിക വെല്ലുവിളി നേരിടുന്ന ദളിത് യുവാവിന് ക്രൂര മര്‍ദ്ദനം

എറണാകുളം: കോതമംഗലത്ത് മാനസിക വെല്ലുവിളി നേരിടുന്ന ദലിത് യുവാവിന് ആള്‍കൂട്ട മര്‍ദ്ദനം. കോതമംഗലം സ്വദേശിയായ ബിനോയിക്കാണ് എല്‍ദോ മാര്‍ ബസേലിയോസ് പള്ളിയിലെ സെക്യൂരിറ്റി ജീവനക്കാരുടെ ക്രൂരമര്‍ദ്ദനമേറ്റത്. പള്ളിയുടെ തിണ്ണയിലിരുന്നതിന് സുരക്ഷ ജീവനക്കാര്‍ വിവസ്ത്രനാക്കി മര്‍ദ്ദിക്കുകയായിരുന്നു. തലയ്ക്കും മുഖത്തും പരിക്കേറ്റ ബിനോയ് ഇപ്പോഴും ചികിത്സയിലാണ്.

പള്ളിയിലെ പെരുന്നാള്‍ ആഘോഷങ്ങള്‍ക്കെത്തിയ ബിനോയി ശാരീരിക ബുദ്ധിമുട്ട് അനുഭവപ്പെട്ടതിനെ തുടര്‍ന്ന് പള്ളിമുറ്റത്തെ തിണ്ണയില്‍ ഇരിക്കുകയായിരുന്നു. തുടര്‍ന്ന് സെക്യൂരിറ്റി ജീവനക്കാര്‍ സ്ഥലത്തെത്തി ബിനോയിയോട് എഴുന്നേറ്റ് പോവാന്‍ ആവശ്യപ്പെടുകയും ക്രൂരമായി മര്‍ദ്ദിക്കുകയുമായിരുന്നു. കാല്‍ കെട്ടിയിട്ടാണ് യുവാവിനെ ആള്‍ക്കുട്ടം മര്‍ദ്ദിച്ചത്. തലയ്ക്കുള്‍പ്പെടെ ചവിട്ടുന്ന ദൃശ്യങ്ങള്‍ സമീപത്തുണ്ടായിരുന്നവര്‍ പകര്‍ത്തുകയും സമൂഹ മാധ്യമങ്ങളില്‍ ഷെയര്‍ ചെയ്യുകയും ചെയ്തിരുന്നു. പള്ളി മുറ്റത്തെ തിണ്ണയിലിരുന്നതിനാണ് സുരക്ഷ ജീവനക്കാര്‍ യുവാവിനെ മര്‍ദ്ദിച്ചതെന്ന് അധികൃതര്‍ സ്ഥിരീകരിച്ചിട്ടുണ്ട്.

സംഭവത്തില്‍ ബിനോയിയുടെ മാതാവിന്റെ പരാതിയില്‍ പൊലിസ് കേസെടുത്തു. നാട്ടുകാര്‍ ഇടപെട്ട് ബനോയിയെ ആശുപത്രിയിലെത്തിച്ചെങ്കിലും സുരക്ഷ ജീവനക്കാരെ ഭയന്ന് ഇദ്ദേഹം വീട്ടിലേക്ക് പോയി. ആറോളം പേര്‍ ചേര്‍ന്നാണ് ബിനോയിയെ മര്‍ദ്ദിച്ചതെന്നാണ് വിവരം.