ഗുവാഹത്തി: ഐ.ഐ.ടി ഗുവാഹത്തിയിലുണ്ടായ പീഡനപരാതിയില്‍ അറസ്റ്റിലായ ഉത്സവ് കദം എന്നയാള്‍ക്ക് ജാമ്യം അനുവദിച്ചുകൊണ്ട് നടത്തിയ ഹൈക്കോടതി പരാമര്‍ശത്തിനെതിരെ പരാതിക്കാരി രംഗത്ത്. 'ഭാവി വാഗ്ദാനമെന്ന് പറഞ്ഞാണ് ഹൈക്കോടതി അയാളെ മോചിതനാക്കിയത്. അയാള്‍ ഐ.ഐ.ടിക്കാരന്‍ ആയതുകൊണ്ടാണ് വെറുതെവിടുന്നതെങ്കില്‍, ഞാനും ഐ.ഐ.ടിക്കാരിയാണ്'- തന്റെ സീനിയറായ വിദ്യാര്‍ഥി പീഡനത്തിനിരയാക്കിയെന്ന പരാതി നല്‍കിയ വിദ്യാര്‍ഥിനി പറഞ്ഞു.

ഐ.ഐ.ടി ഗുവാഹത്തിയില്‍ പഠിക്കുന്ന 'നല്ല ഭാവി'യുള്ള വിദ്യാര്‍ഥിയാണ് പ്രതിയെന്ന് ചൂണ്ടിക്കാട്ടിയാണ് ഉത്സവ് കദത്തിന് ഗുവാഹത്തി ഹൈക്കോടതി 2021 ഓഗസ്റ്റ് 13ന് ജാമ്യം അനുവദിച്ചത്.

മാര്‍ച്ച് 28നാണ് ബിരുദ വിദ്യാര്‍ഥിനിയായ പരാതിക്കാരി പീഡിപ്പിക്കപ്പെട്ട് അബോധാവസ്ഥയിലായത്. ഉത്സവിനെക്കൂടാതെ, നാലു പേര്‍ കൂടി വിദ്യാര്‍ഥിനിയെ പീഡിപ്പിച്ചിട്ടുണ്ടെന്ന് അന്വേഷണത്തില്‍ കണ്ടെത്തിയത്.