മനാമ : ഹിജ്‌റ വര്‍ഷത്തിലെ ആദ്യമാസമായ മുഹര്‍റത്തിലെ പത്താമത്തെ ദിവസമായ ആശൂറയോടനുബന്ധിച്ച് ബഹ്‌റൈനിൽ അനുവദിച്ച സൗജന്യ ബസ്, ഗോള്‍ഫ് കാര്‍ട്ട് സേവനങ്ങൾ തുടങ്ങി. മനാമയിലെ റിവൈവല്‍ സെന്ററിലേക്ക് പോകുന്നവര്‍ക്കും തിരിച്ചുവരുന്നവര്‍ക്കുമായി ആറു പ്രധാന റൂട്ടുകളില്‍ സേവനം ലഭിക്കുന്നുണ്ട്. മുഹറം പത്താം തീയതി രാത്രി വരെ സൗജന്യ ബസ് പ്രവര്‍ത്തിക്കും.

കഴിഞ്ഞദിവസം നടന്ന പദ്ധതി ഉദ്ഘാടനം ജാഫാരി വഖഫ് (എന്‍ഡോവ്മെന്റ്സ്) ഡയറക്ടറേറ്റ് ബോര്‍ഡ് ചെയര്‍മാന്‍ യൂസിഫ് അല്‍ സാലിഹ് നിർവഹിച്ചു. ബോര്‍ഡ് വൈസ് ചെയര്‍മാന്‍ അബ്ദുല്‍ജലീല്‍ അല്‍ തരീഫ്, കരാര്‍ ട്രാന്‍സ്പോര്‍ട്ട് കമ്പനിയായ അല്‍ സാദിഖിന്റെ ജനറല്‍ മാനേജര്‍ മാജിദ് താഹറ് എന്നിവര്‍ പങ്കെടുത്തു.

പ്രധാന സ്റ്റേഷനുകള്‍

* ജിദാഫ്‌സ്- അല്‍ദൈഹ് ആന്‍ഡ് ജിദാസ്സ് ഇന്റര്‍സെക്ഷന്‍

* അല്‍ ബിലാദ് അല്‍ ഖദീം- അല്‍ ഖാമീസ് ഇന്റര്‍സെക്ഷന്‍

* അല്‍ ബുര്‍ഹാമ- സിയാം ഗാരേജിന് സമീപം

* സല്‍മാനിയ- ഹയാത്ത് പ്ലാസ മാളിന് സമീപം

* അല്‍ ഖഫൂല്‍- ഇമാം അല്‍ സാദിഖ് പള്ളിക്ക് സമീപം.

ആശൂറാഇന് ബഹ്‌റൈനിൽ പൊതു അവധി ആണ്. രാജ്യത്തെ എല്ലാ മന്ത്രാലയങ്ങള്‍ക്കും സര്‍ക്കാര്‍ വകുപ്പുകള്‍ക്കും ഏജന്‍സികള്‍ക്കും പൊതു സ്ഥാപനങ്ങള്‍ക്കും ഇന്നും നാളെയും (ശനി, ഞായര്‍) അവധിയായിരിക്കും. ശനിയാഴ്ച ഔദ്യോഗിക അവധി ദിനമായതിനാല്‍, അതിന് പകരം ജൂലൈ ഏഴു തിങ്കളാഴ്ചയും അവധി നല്‍കിയിട്ടുണ്ട്.

Jaafari Endowments Directorate announced launch of free transportation service Ashura season