ബംഗളൂരു: വീണ്ടും കേരളത്തില്‍ നിന്നുള്ളവര്‍ക്ക് നിബന്ധനകള്‍ കര്‍ക്കശമാക്കി കര്‍ണാടക. സംസ്ഥാനത്തുനിന്നെത്തുന്നവര്‍ക്ക് നിര്‍ബന്ധിത ക്വാറന്റീന്‍ ഏര്‍പ്പെടുത്തിയാണ് കര്‍ണാടക സര്‍ക്കാറിന്റെ പുതിയ ഉത്തരവ്. ഇതിനായി പ്രത്യേക കര്‍മസമിതിയെ നിയോഗിക്കും. കേരള അതിര്‍ത്തിയില്‍ കൂടുതല്‍ പൊലിസിനെ നിയോഗിക്കും. വിമാനത്താവളങ്ങളിലും റെയില്‍വേസ്റ്റേഷനിലും അതിര്‍ത്തിയിലും പരിശോധന കര്‍ശനമാക്കുന്നതിനും തീരുമാനിച്ചതായി ഉത്തരവില്‍ പറയുന്നു.

ഏഴ് ദിവസമായിരിക്കും നിര്‍ബന്ധിത ക്വാറന്റീന്‍. എട്ടാം ദിവസം ആര്‍.ടി.പി.സി.ആര്‍ പരിശോധന നടത്തും. കേരളത്തില്‍ നിന്ന് ആര്‍.ടി.പി.സി.ആര്‍ നെഗറ്റീവ് സര്‍ട്ടിഫിക്കറ്റുമായി വരുന്നവരാണെങ്കില്‍ പോലും നിര്‍ബന്ധിത ക്വാറന്റീനും വീണ്ടും പരിശോധനയ്ക്കും വിധേയമാകണം.

രണ്ടു ഡോസ് വാക്‌സീനും സ്വീകരിച്ച രോഗലക്ഷണങ്ങള്‍ ഇല്ലാത്തവര്‍ക്ക് യാത്ര ചെയ്യാന്‍ ആര്‍.ടി.പി.സി.ആര്‍ പരിശോധന വേണ്ടെന്നായിരുന്നു കേന്ദ്ര സര്‍ക്കാരിന്റെ പുതുക്കിയ മാര്‍ഗനിര്‍ദ്ദേശം. ഇതിന് വിരുദ്ധമായാണ് കര്‍ണാടകത്തിന്റെ ഉത്തരവ്.