തിരുവനന്തപുരം: വനിതാ കമ്മിഷന്‍ അംഗം ഷാഹിദ കമാലിന്റെ വിദ്യാഭ്യാസ യോഗ്യത സംബന്ധിച്ച് വ്യക്തമായ ഉത്തരംനല്‍കാതെ സര്‍ക്കാര്‍. നിയമസഭയില്‍ ഷാഫി പറമ്പില്‍ എം.എല്‍.എയുടെ ചോദ്യത്തിന് വ്യക്തമായ ഉത്തരംനല്‍കാന്‍ വകുപ്പ് മന്ത്രി വീണാ ജോര്‍ജിന് കഴിഞ്ഞില്ല. കേരള വിമന്‍സ് കമ്മിഷന്‍ ആക്ട് പ്രകാരം നിയമിക്കുന്ന വനിതാ കമ്മിഷന്‍ ചെയര്‍പേഴ്‌സനും അംഗങ്ങള്‍ക്കും പ്രത്യേക വിദ്യാഭ്യാസ യോഗ്യത ഇതുവരെ നിശ്ചയിച്ചിട്ടില്ലെന്നാണ് മന്ത്രിയുടെ മറുപടി.
ഷാഹിദ കമാലിന്റേത് വ്യാജ വിദ്യാഭ്യാസ യോഗ്യതയാണെന്ന തരത്തില്‍ വിവാദമുയര്‍ന്നിരുന്നു. ഇതിന്റെ പശ്ചാത്തലത്തില്‍ ലഭിച്ച പരാതിയുടെ അടിസ്ഥാനത്തില്‍ ലോകായുക്ത ഷാഹിദ കമാലിന് നോട്ടിസ് നല്‍കിയിരുന്നു.