ബാസിത് ഹസന്‍

തൊടുപുഴ: ഡാമും പവര്‍ഹൗസുമില്ലാതെ ശേഷി കൂട്ടുന്നതിലൂടെ മാത്രം 8.5 കോടി യൂനിറ്റ് വൈദ്യുതി സംസ്ഥാനത്തിന് ലഭിക്കുന്ന ചെങ്കുളം ഓഗ്‌മെന്റേഷന്‍ പദ്ധതി ഇഴയുന്നു. 12 വര്‍ഷം മുന്‍പ് നിര്‍മാണം തുടങ്ങിയ ടണല്‍ ഇനി 2,175 മീറ്റര്‍ കൂടി തീരാനുണ്ട്. ഷെഡ്യൂള്‍ പ്രകാരം ശരാശരി ഒരു മീറ്റര്‍ ടണലാണ് ഒരു ദിവസം തീര്‍ക്കാന്‍ കഴിയുന്നത്. ഒരു ദിവസം പോലും നഷ്ടപ്പെടാതെ നിര്‍മാണം തുടര്‍ന്നാല്‍ തന്നെ ടണല്‍ പൂര്‍ത്തിയാക്കാന്‍ ഇനി ആറുവര്‍ഷം കൂടി വേണം. 6,710 മീറ്ററാണ് ടണലിന്റെ മൊത്തം നീളം. ചെങ്കുളം ഓഗ്‌മെന്റേഷന്‍ വൈകുന്നതോടെ അപ്പര്‍ ചെങ്കുളം പദ്ധതിയും വൈകും.

2000 ജനുവരി 14 ന് കേന്ദ്രാനുമതി ലഭിച്ച ചെങ്കുളം പദ്ധതി വൈകുന്നതു മൂലം സംസ്ഥാനത്തിന് പ്രതിവര്‍ഷം 38.25 കോടിയുടെ നഷ്ടമുണ്ട്. സാങ്കേതിക പ്രശ്‌നങ്ങളാല്‍ ഇടയ്ക്ക് പാതിവഴിയില്‍ നിലച്ച പദ്ധതിയുടെ കുരുക്കഴിക്കാന്‍ ഒന്നരക്കോടി മുടക്കി കേന്ദ്ര ഏജന്‍സിയായ എന്‍.എച്ച്.പി.സിയുടെ (നാഷനല്‍ ഹൈഡ്രോ പവര്‍ കോര്‍പറേഷന്‍) വിദഗ്‌ധോപദേശം തേടിയിരുന്നു. ചെങ്കുളം ഡാമില്‍ കൂടുതല്‍ വെള്ളമെത്തിച്ച് ചെങ്കുളം പവര്‍ ഹൗസില്‍ ഉല്‍പ്പാദനം വര്‍ധിപ്പിക്കുകയാണ് പദ്ധതിയുടെ ലക്ഷ്യം. കല്ലാര്‍ പുഴയിലെ വെള്ളം ടണല്‍ വഴിയാണ് ചെങ്കുളം ഡാമില്‍ എത്തിക്കുക. കൊച്ചി - ധനുഷ്‌കോടി ദേശീയ പാതയിലെ കല്ലാര്‍ പാലത്തിന് സമീപത്തുനിന്നാണ് ടണല്‍ തുടങ്ങുന്നത്. ചെങ്കുളം ഡാം നിറയുന്നതോടെ വേനലില്‍ പോലും ശരാശരി ഉല്‍പ്പാദനം നടത്താനാകും.
ഡോ.ശശി ഏലൂര്‍ ഗ്രൂപ്പ്, യൂനിടെക്ക് കമ്പനി കണ്‍സോര്‍ഷ്യമാണ് പദ്ധതിയുടെ കരാറുകാര്‍. 2009 ജൂലൈയില്‍ നിര്‍മാണം തുടങ്ങി. പള്ളിവാസലില്‍ നിന്ന് ഉല്‍പ്പാദനത്തിനുശേഷം പുറംതളളുന്ന വെള്ളം പമ്പ് ചെയ്താണ് നിലവില്‍ ചെങ്കുളം ഡാമില്‍ ജലവിതാനം നിലനിര്‍ത്തുന്നത്. കല്ലാറില്‍ നിന്ന് ജലമെത്തിക്കാന്‍ സംവിധാനമാകുന്നതോടെ പമ്പിങ്ങിനായി ഇപ്പോഴുണ്ടാകുന്ന അഞ്ച് മെഗാവാട്ട് പ്രതിദിന വൈദ്യുതി നഷ്ടം ഗണ്യമായ തോതില്‍ ഒഴിവാക്കാം.
ചെങ്കുളം, പള്ളിവാസല്‍, പന്നിയാര്‍ പദ്ധതികളുടെ വിവാദമായ നവീകരണത്തിനായി ചെലവഴിച്ചത് 374.5 കോടിയാണ്. പദ്ധതി മൊത്തം മാറ്റി സ്ഥാപിച്ചിരുന്നെങ്കില്‍ പോലും ഇത്രയും ചെലവ് വരുമായിരുന്നില്ല. മാത്രമല്ല ആധുനികവും ഉയര്‍ന്ന ശേഷിയുള്ളതുമായ സംവിധാനം സ്ഥാപിക്കുകയും ചെയ്യാമായിരുന്നു.