ദുബായ്: യുഎഇയില്‍ കഴിഞ്ഞ 18 വര്‍ഷമായി ഗുരുവായൂര്‍ നിയോജക മണ്ഡലത്തിലെ പ്രവാസി കൂട്ടായ്മയായ ഗ്രാന്മ ഗുരുവായൂര്‍ 'ഗ്രാമോത്സവം സീസണ്‍-3' നവംബര്‍ 12ന് ഉച്ച 2.30 മുതല്‍ ഖിസൈസ് ക്രെസന്റ് ഇഗ്‌ളീഷ് സ്‌കൂളില്‍ ഒരുക്കുന്നു.
പഞ്ചാരി മേളം, പഞ്ചവാദ്യം, ശിങ്കാരി മേളം, ഒപ്പന, തിരുവാതിരക്കളി, കോല്‍ക്കളി, ദഫ്മുട്ട്, ക്‌ളാസിക്കല്‍ നൃത്തം എന്നിവയോടെ; കാവടി, പുലിക്കളി, മയിലാട്ടം, കരകാട്ടം, മുത്തുക്കുട എന്നിവയുടെ അകമ്പടിയോടെ വര്‍ണാഭമായ ഘോഷയാത്രയോടെയാണ് ഗ്രാമോത്സവം നടത്തുന്നതെന്ന് പ്രസിഡന്റ് ജമാല്‍ മന്ദിയില്‍, ജന.സെക്രട്ടറി രജീഷ് ചനായന്‍, ട്രഷറര്‍ സുനില്‍ തണ്ടെങ്ങാട്ടില്‍ വാര്‍ത്താസമ്മേളനത്തില്‍ പറഞ്ഞു.
തട്ടുകട, ഉപ്പിലിട്ടത്, കപ്പലണ്ടി, പായസം, ഹല്‍വ തുടങ്ങിയ സ്റ്റാളുകള്‍ ഇവിടെ പ്രവര്‍ത്തിക്കുന്നതാണ്. പ്രവാസി ക്ഷേമനിധി മുന്‍ സംസ്ഥാന അധ്യക്ഷന്‍ പി.ടി കുഞ്ഞുമുഹമ്മദ് ഉദ്ഘാടനം ചെയ്യും. സാഹിത്യകാരന്‍ മധുപാല്‍ മുഖ്യാതിഥിയായി സാംസ്‌കാരിക സമ്മേളനം നടക്കും. പിന്നണി ഗായിക ദുര്‍ഗ വിശ്വനാഥ്, റോക്സ്റ്റാര്‍ ദാബ്‌സീ, രഞ്ജു ചാലക്കുടി, എസ് ബാന്‍ഡ് ഫ്യൂഷന്‍, ഇശല്‍ ദുബായ്, മടിക്കൈ ടീം എന്നിവ നയിക്കുന്ന ദൃശ്യ-സംഗീത വിരുന്നുണ്ടാകും. സി.കെ കുമാരന്‍ അവാര്‍ഡ് ഈ വര്‍ഷം ആതുര സേവന രംഗത്ത് സുത്യാര്‍ഹ സേവനം നല്‍കുന്ന ഡോ. പി.കെ അബൂബക്കറിന് നല്‍കും.
പ്രളയ സമയത്തും കോവിഡ് മഹാമാരി രൂക്ഷമായ കാലയളവിലും നാട്ടിലും യുഎഇയിലും ദുരിതാശ്വാസ പ്രവര്‍ത്തനങ്ങളില്‍ മുന്നില്‍ നിന്ന് നയിച്ച സംഘടനയാണ് ഗ്രാന്മ.
ഗ്രാമോത്സവം കണ്‍വീനര്‍ പ്രതീഷ് ചനായന്‍, ജോ.കണ്‍വീനര്‍ മുസ്തഫ കണ്ണാട്ട്, ജോ.കണ്‍വീനര്‍ നാസര്‍ ചുള്ളിയില്‍, രക്ഷാധികാരി അബ്ദുന്നാസര്‍ എന്നിവര്‍ പങ്കെടുത്തു.