പൊലീസ് സേനയില്‍ അഴിച്ചുപണി; മലപ്പുറം ജില്ലാ പൊലീസ് മേധാവി സ്ഥാനത്ത് നിന്ന് സുജിത്ത് ദാസിനെ നീക്കി

തിരുവനന്തപുരം: സംസ്ഥാനത്തെ പൊലീസ് സേനയില്‍ വന്‍ അഴിച്ചുപണി. മലപ്പുറം ജില്ലാ പൊലീസ് മേധാവി സ്ഥാനത്ത് നിന്ന് സുജിത്ത് ദാസിനെ നീക്കി. പകരം ചുമതല കൊച്ചി ഡി.സി.പി ശശിധരന്. സുജിത്ത് ദാസിന് സ്‌പെഷ്യല്‍ ഓപ്പറേഷന്‍ ഗ്രൂപ്പ് പൊലീസ് സൂപ്രണ്ടായാണ് മാറ്റം.

കിരണ്‍ നാരായണ്‍ തിരുവനന്തപുരം റൂറല്‍ പൊലീസ് മേധാവി. മെറിന്‍ ജോസഫ് ഐ.പി.എസിനെ തിരുവനന്തപുരം ക്രൈംബ്രാഞ്ച് സൂപ്രണ്ടായും നിയമിച്ചു. നവനീത് ശര്‍മയെ തൃശൂര്‍ റൂറല്‍ പൊലീസ് മേധാവിയായും വൈഭവ് സക്‌സേനയെ എറണാകുളം റൂറല്‍ പൊലീസ് മേധാവിയായും നിയമിക്കും.

കോഴിക്കോട് റൂറല്‍ പൊലീസ് മേധാവി ശില്‍പ്പ.ഡി, കാസര്‍ഗോഡ് ജില്ലാ പൊലീസ് മേധാവിയായി ബിജോയ് പി, വിഷ്ണു പ്രദീപ് ടി.കെ ഇടുക്കി ജില്ലാ പൊലീസ് മേധാവി എന്നിങ്ങനെയാണ് മാറ്റങ്ങള്‍.

താനൂര്‍ കസ്റ്റഡിമരണവുമായി ബന്ധപ്പെട്ട വിവാദങ്ങളില്‍ കൂടുതല്‍ വിമര്‍ശനങ്ങള്‍ എസ്. സുജിത്ത് ദാസ് നേരിട്ടിരുന്നു. തുടര്‍ന്ന് പരിശീലനത്തിന് പോവാന്‍ സര്‍ക്കാര്‍ നിര്‍ദേശം നല്‍കുകയും ചെയ്തു. ഹൈദരാബാദ് നാഷണല്‍ പോലീസ് അക്കാദമിയിലായിരുന്നു പരിശീലനം.