ജിദ്ദ: ഒ.ഐ.സി.സി മക്ക സെന്‍ട്രല്‍ കമ്മിറ്റിയുടെ ആഭിമുഖ്യത്തില്‍ ''വര്‍ണ്ണ വിസ്മയം'' മെഗാ ഫെസ്റ്റ്-2022 സംഘടിപ്പിക്കുമെന്ന് ഭാരവാഹികള്‍ വാര്‍ത്ത സമ്മേളനത്തില്‍ അറിയിച്ചു.ഡിസംബര്‍ 10 ശനിയാഴ്ച വൈകിട്ട് 5 മണി മുതല്‍ മക്ക ഹുസൈനിയയിലുള്ള ഖസര്‍ അല്‍ റയ്യാന്‍ ഓഡിറ്റോറിയത്തില്‍ വെച്ചാണ് പരിപാടി നടത്തപ്പെടുക എന്നും ഭാരവാഹികള്‍ പറഞ്ഞു.

മെഗാ ഫെസ്റ്റ് പരിപാടിയില്‍ കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ''ഭാരത് ജോഡോ'' യാത്രക്ക് അഭിവാദ്യം അര്‍പ്പിച്ചു കൊണ്ടുള്ള സദസ്സും ഉണ്ടായിരിക്കും. വൈകിട്ട് 7 മണി മുതല്‍ പട്ടുറുമാല്‍ ഫെയിം ഷെജീറും ഫ്ളവേഴ്സ് കോമഡി ഉത്സവം ഫെയിം ആശാ ഷിജുവും നയിക്കുന്ന മ്യൂസിക്കല്‍ നൈറ്റും ഉണ്ടാവും. കൂടാതെ മക്കയിലെ വിവിധ സ്‌കൂളുകളിലെ കുട്ടികള്‍ അവതരിപ്പിക്കുന്ന വര്‍ണ്ണ ശബളമായ കലാ പരിപാടികളും ഉണ്ടാവുമെന്നും ഭാരവാഹികള്‍ വിശദീകരിച്ചു.

പ്രവാസികള്‍ക്കിടയില്‍ വിവിധ തുറകളില്‍ വ്യക്തിമുദ്ര പതിപ്പിച്ച വീശിഷ്ട വ്യക്തികള്‍ക്ക് മക്ക ഒ.ഐ.സി.സി വക എക്സലന്‍സ് അവാര്‍ഡുകള്‍ പരിപാടിയില്‍ വെച്ച് സമ്മാനിക്കും. മക്ക ഒ.ഐ.സി.സി എക്സലന്‍സ് അവാര്‍ഡുകള്‍ക്ക് അര്‍ഹരായവര്‍: പൊതുപ്രവര്‍ത്തന-ജീവകാരുണ്യം:അബ്ദുല്‍ മുഹയ്മീന്‍(കുഞ്ഞുമോന്‍ കാക്കിയ),ആതുരസേവനം:ഡോ.അഹമ്മദ് ആലുങ്ങല്‍, ബിസിനസ്സ്:എ.സി മന്‍സൂര്‍,മാധ്യമ രംഗം: പി. എം. മായിന്‍ കുട്ടി

ഷറഫിയ്യ സഫയര്‍ റെസ്റ്റോറന്റ് ഹാളില്‍ വെച്ച് നടന്ന വാര്‍ത്ത സമ്മേളനത്തില്‍ മക്ക ഒ.ഐ.സി.സി പ്രസിഡന്റ് ഷാനിയാസ് കുന്നിക്കോട്, ജനറല്‍ സെക്രട്ടറി ഷാജി ചുനക്കര, വൈസ് പ്രസിഡന്റ് സാക്കിര്‍ കൊടുവള്ളി, ട്രഷറര്‍ റഷീദ് ബിന്‍സാഗര്‍, പ്രോഗ്രാം കോഡിനേറ്റര്‍ ജിബിന്‍ സമദ് കൊച്ചി എന്നിവര്‍ പങ്കെടുത്തു.