പാലാ: ബിഷപ്പ് ജോസഫ് കല്ലറങ്ങാട്ട് പാണ്ഡിത്യമുള്ള വ്യക്തിയെന്നും നാര്‍കോട്ടിക് ജിഹാദ് പരാമര്‍ശവുമായി ബന്ധപ്പെട്ട പ്രശ്‌നം വഷളാക്കിയത് തീവ്രവാദികളെന്നും മന്ത്രി വി.എന്‍ വാസവന്‍. പാലാ ബിഷപ്പുമായുള്ള കൂടിക്കാഴ്ചയ്ക്കുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. 

ബിഷപ്പുമായി നടത്തിയത് സൗഹൃദ കൂടിക്കാഴ്ചയാണ്. തീര്‍ത്തും വ്യക്തിപരമായ സന്ദര്‍ശനമാണ്. സര്‍ക്കാര്‍ പ്രതിനിധിയായിട്ടല്ല ഇവിടെ എത്തിയത്. നാര്‍കോട്ടിക് ജിഹാദ് വിവാദം ബിഷപ്പുമായി ചര്‍ച്ച ചെയ്തില്ല. ഒരു പരാതിയും ബിഷപ്പ് തന്നോട് പറഞ്ഞില്ല. നാര്‍കോട്ടിക് ജിഹാദ് വിഷയത്തില്‍ സമവായ ചര്‍ച്ചയുടെ സാഹചര്യമില്ല.  ഈ വിഷയം ശ്രദ്ധയില്‍പ്പെട്ടപ്പോള്‍ തന്നെ സര്‍ക്കാര്‍ ഇടപെട്ടു. സമൂഹമാധ്യമങ്ങളിലെ ചേരിതിരിവ് ഉണ്ടാക്കുന്ന പ്രതികരണങ്ങളില്‍ ശക്തമായ നടപടിയുണ്ടാവും. അസമാധാനത്തിന്റെ അന്തരീക്ഷമുണ്ടാക്കാന്‍ ആരെയും അനുവദിക്കില്ലെന്നും മന്ത്രി പറഞ്ഞു.