തൃശൂര്‍: പാര്‍ട്ടിയെ നയിക്കുമ്പോള്‍ കര്‍ക്കശമായ സമീപനം ആവശ്യമാണെന്ന് കെ.പി.സി.സി പ്രസിഡന്റ് കെ. സുധാകരന്‍. കാര്‍ക്കശ്യത്തില്‍ വെള്ളം ചേര്‍ത്താല്‍ കാര്യങ്ങള്‍ സുഗമമായി മുന്നോട്ടുപോകില്ലെന്നും തൃശൂര്‍ ഡി.സി.സി ഓഫിസില്‍ നടന്ന നേതൃയോഗത്തില്‍ അദ്ദേഹം പറഞ്ഞു. 

കേഡര്‍ എന്നത് പൊതുപ്രവര്‍ത്തനത്തിന് സ്വയം സമര്‍പ്പിക്കാന്‍ കഴിവുള്ളവരുടെ ഒരു കൂട്ടമാണ്. സ്വാതന്ത്ര്യസമരകാലത്ത് ഗാന്ധിജിയാണ് ഈ വാക്ക് സംഭാവന ചെയ്തത്. അത്തരം സംവിധാനം സൃഷ്ടിക്കാനുള്ള ശ്രമമാണ് നടക്കുന്നത്. മാറ്റമുണ്ടാക്കാന്‍ കഴിയും. കാത്തിരിക്കണം. റിസള്‍ട്ടില്‍ ശ്രദ്ധകേന്ദ്രീകരിച്ചുള്ള പ്രവര്‍ത്തനങ്ങളിലൂടെ പാര്‍ട്ടിയെ മാറ്റാനുള്ള ശ്രമമാണ് നടക്കുന്നത്. കാര്യക്ഷമതയില്ലാതെ മാറിയകാലത്ത് പിടിച്ചുനില്‍ക്കാനാവില്ല. 

സമൂഹത്തില്‍നിന്നും സാമൂഹ്യസേവനത്തില്‍നിന്നും കോണ്‍ഗ്രസ് പ്രവര്‍ത്തകര്‍ അകന്നു. ജനങ്ങളില്‍നിന്ന് അകലം പാലിക്കുന്നത് കോണ്‍ഗ്രസിന്റെ പാരമ്പര്യമല്ല. കഴിഞ്ഞ നിയമസഭാ തിരഞ്ഞെടുപ്പില്‍ പോയിന്റ് രണ്ട് ശതമാനം വോട്ട് വ്യത്യാസം മാത്രമാണ് കോണ്‍ഗ്രസിന് എതിര്‍ പാര്‍ട്ടിയുമായി ഉണ്ടായത്. ഒന്നും പ്രവര്‍ത്തിച്ചില്ലെങ്കിലും കോണ്‍ഗ്രസിനു വോട്ട് ചെയ്യാന്‍ ആളുകളുണ്ടെന്ന സന്ദേശമാണ് അതു നല്‍കുന്നത്. അതു തിരിച്ചറിഞ്ഞ് ജനങ്ങളുടെ പ്രതീക്ഷ നിറവേറ്റുന്ന സമീപനമാണ് കോണ്‍ഗ്രസിന് ഇന്നാവശ്യമെന്നും അദ്ദേഹം പറഞ്ഞു.  ഡി.സി.സി പ്രസിഡന്റ് ജോസ് വള്ളൂര്‍ അധ്യക്ഷനായി. കെ.പി.സി.സി വര്‍ക്കിങ് പ്രസിഡന്റുമാരായ കൊടിക്കുന്നില്‍ സുരേഷ് എം.പി, പി.ടി തോമസ് എം.എല്‍.എ എന്നിവരും ടി.എന്‍ പ്രതാപന്‍ എം.പി, ടി.ജെ സനീഷ്‌കുമാര്‍ എം.എല്‍.എ തുടങ്ങിയവരും പങ്കെടുത്തു.