തിരുവനന്തപുരം: സംസ്ഥാനത്ത് ജനുവരിയോടെ സമ്പൂര്‍ണ വാക്‌സിനേഷന്‍ നടത്താന്‍ ലക്ഷ്യമിട്ട് ആരോഗ്യവകുപ്പ്. നിലവിലെ വേഗതയില്‍ പോയാല്‍തന്നെ ലക്ഷ്യം പൂര്‍ത്തീകരിക്കാനാകുമെന്നാണ് ആരോഗ്യവകുപ്പിന്റെ വിലയിരുത്തല്‍.

ആദ്യ ഡോസ് വിതരണം 100 ശതമാനമാകാന്‍ 25 ദിവസവും രണ്ട് ഡോസിന്റെയും വിതരണം പൂര്‍ത്തിയാകാന്‍ പരമാവധി 135 ദിവസവും ഇനി വേണമെന്നാണ് ആരോഗ്യവിദഗ്ധരുടെ കണക്ക്. സ്വകാര്യ മേഖലയിലെ വാക്‌സിനേഷന്‍ വേഗത്തിലായാല്‍ കണക്കുകൂട്ടിയതിലും വേഗത്തില്‍ ലക്ഷ്യത്തിലെത്താനാകുമെന്നാണ് പ്രതീക്ഷ.
ആദ്യ ഡോസ് നല്‍കിയവരുടെ എണ്ണം 89 ശതമാനമായി (2,37,96,983). രണ്ടാം ഡോസ് നല്‍കിയത് 36.7 ശതമാനം പേര്‍ക്കാണ് (98,27,104). 45 വയസില്‍ കൂടുതല്‍ പ്രായമുള്ള 96 ശതമാനത്തിലധികം ആളുകള്‍ക്ക് ഒന്നാം ഡോസും 55 ശതമാനം പേര്‍ക്ക് രണ്ട് ഡോസും വാക്‌സിന്‍ സംസ്ഥാനം നല്‍കി.

പുതിയ ജനസംഖ്യാ കണക്കനുസരിച്ച് രണ്ടു കോടി 87 ലക്ഷത്തില്‍ നിന്ന് രണ്ടു കോടി 67 ലക്ഷമായാണ് വാക്‌സിനേഷന് അര്‍ഹരായ ആളുകളുടെ എണ്ണം കുറഞ്ഞത്. ഇതോടെ ലക്ഷ്യത്തിലേക്ക് സര്‍ക്കാര്‍ കൂടുതല്‍ അടുത്തു. 29 ലക്ഷത്തോളം പേര്‍ക്കാണ് ഇനി ആദ്യഡോസ് നല്‍കാനുള്ളത്. ഇവര്‍ക്ക് 84 ദിവസം പൂര്‍ത്തിയാകാനെടുക്കുന്ന ദിവസം കൂടി കണക്കാക്കിയാണ് നാലു മാസമെന്ന കണക്ക്. അതായത് 115 മുതല്‍ പരമാവധി 135 ദിവസം വരെ. സര്‍ക്കാര്‍ മേഖലയില്‍ വാക്‌സിന്‍ ലഭ്യത കൂടിയതോടെ സ്വകാര്യ മേഖലയില്‍ പണം നല്‍കി വാക്‌സിനെടുക്കുന്നത് കുറഞ്ഞിട്ടുണ്ട്. ഇതു പരിഹരിക്കാന്‍ സ്വകാര്യ മേഖലയിലും വാക്‌സിന്‍ സൗജന്യമാക്കാനുള്ള ഇടപെടല്‍ വേണമെന്ന് ആവശ്യം ഉയര്‍ന്നിട്ടുണ്ട്. ഇതുവഴി വാക്‌സിനേഷന്‍ വേഗം ഇനിയും വര്‍ധിപ്പിക്കാന്‍ കഴിയുമെന്നാണ് സ്വകാര്യ ആശുപത്രികള്‍ മുന്നോട്ടുവയ്ക്കുന്ന നിര്‍ദേശം.