എടവണ്ണ: ബൈക്കുകളില്‍ കറങ്ങിയ സ്‌കൂള്‍ വിദ്യാര്‍ഥികള്‍ പൊലീസ് വലയിലായി. ശനിയാഴ്ച എടവണ്ണ എസ്.ഐ.പി.ദയാ ശീലന്റെ നേതൃത്വത്തിലാണു പരിസര പ്രദേശങ്ങളിലെ വിദ്യാലയങ്ങള്‍ കേന്ദ്രീകരിച്ചു നടത്തിയ പരിശോധനയിലാണ് 25 ബൈക്കുകള്‍ പിടികൂടിയത്.
ഹെല്‍മെറ്റില്ലാതെയും ലൈസന്‍സില്ലാതെയും വിദ്യാര്‍ഥികള്‍ ഓടിച്ച ബൈക്കുകളാണ് പൊലിസ് പിടികൂടിയത്. ബൈക്കുകള്‍ സ്റ്റേഷന്‍ പരിസരത്തെത്തിക്കുകയും കുട്ടികളെയും രക്ഷിതാക്കളെയും സ്റ്റേഷനിലേക്കു വിളിച്ചു വരുത്തി പിഴ ഈടാക്കുകയും ചെയ്തു.
പിഴക്കു പുറമേ രക്ഷിതാക്കള്‍ക്കും വിദ്യാര്‍ഥികള്‍ക്കുമായി എസ്.സി.പി.ഒ.ഫിലിപ് മമ്പാടിന്റെ നേതൃത്വത്തില്‍ സ്റ്റേഷനില്‍ വെച്ചു ബോധവത്കരണവും നല്‍കിയാണു വിട്ടയച്ചത്.നമ്പര്‍ പ്ലൈറ്റ്, സൈഡ് കണ്ണാടി, ഇന്‍ഡികേറ്റര്‍ തുടങ്ങിയവ ഇല്ലാത്ത ബൈക്കുകള്‍ക്ക് സ്റ്റേഷനില്‍ വെച്ച് തന്നെ അവ ഘടിപ്പിച്ച ശേഷമാണു ബൈക്കുകള്‍ വിട്ടുനല്‍കിയത്. വരും ദിവസങ്ങളില്‍ പരിശോധന കൂടുതല്‍ ശക്തമാക്കുമെന്നും പൊലീസ് പറഞ്ഞു.