കൊച്ചി: നെടുങ്കണ്ടം രാജ്കുമാര്‍ കസ്റ്റഡിമരണക്കേസുമായി ബന്ധപ്പെട്ട് രൂപീകരിച്ച ജസ്റ്റിസ് നാരായണക്കുറുപ്പ് കമ്മിഷന്‍ ശുപാര്‍ശ നടപ്പാക്കുന്നതിന് വിവിധ വകുപ്പുകള്‍ ഉന്നയിച്ച ആശങ്കകള്‍ പരിഹരിക്കുമെന്ന് സര്‍ക്കാര്‍ ഹൈക്കോടതിയെ അറിയിച്ചു. ആഭ്യന്തരവകുപ്പ് ഡെപൂട്ടി സെക്രട്ടറി എം.പി പ്രിയമോള്‍ സമര്‍പ്പിച്ച സത്യവാങ്മൂലത്തിലാണ് ആശങ്ക പരിഹരിക്കുമെന്ന് വ്യക്തമാക്കിയത്. ആരോഗ്യവകുപ്പ്, ജയില്‍വകുപ്പ്, സംസ്ഥാന പൊലിസ് മേധാവി, കുടുംബാരോഗ്യക്ഷേമ വകുപ്പ് തുടങ്ങിയവര്‍ ശുപാര്‍ശകള്‍ നടപ്പാക്കുന്നതില്‍ ആശങ്കയറിയിച്ചതായി സത്യവാങ്മൂലത്തില്‍ പറയുന്നു. കമ്മിഷന്‍ ശുപാര്‍ശകള്‍ നടപ്പാക്കാന്‍ കഴിഞ്ഞ ഫെബ്രുവരി 17ന് വിവിധ വകുപ്പുകള്‍ക്ക് സര്‍ക്കാര്‍ ഉത്തരവ് നല്‍കിയിരുന്നു. കമ്മിഷന്‍ ശുപാര്‍ശയുടെ അടിസ്ഥാനത്തില്‍ പുറപ്പെടുവിച്ച സര്‍ക്കാര്‍ ഉത്തരവില്‍, ഡോക്ടര്‍മാര്‍ക്കുള്ള മാര്‍ഗരേഖകള്‍ ഉള്‍പ്പെടുത്താത്ത നടപടി ചോദ്യം ചെയ്ത് ഡോ. കെ.പ്രദീപ് ഹൈക്കോടതിയില്‍ സമര്‍പ്പിച്ച ഹരജിയിലാണ് സത്യവാങ്മൂലം സമര്‍പ്പിച്ചത്.