മരുന്ന് സംഭരണ കേന്ദ്രം ഒഴിയാന്‍ ഇസ്‌റാഈല്‍ സമ്മര്‍ദ്ദം ചെലുത്തുന്നു; ആരോഗ്യ സംഘടനയുടെ വെളിപെടുത്തല്‍

ഗസ്സ: കൂട്ടക്കുരുതി തുടരുന്ന ഗസ്സയില്‍ സഹായം എത്തിക്കുന്ന മരുന്ന് സംഭരണകേന്ദ്രം ഒഴിപ്പിക്കാന്‍ ഇസ്‌റാഈല്‍ സമ്മര്‍ദം ചെലുത്തിയെന്ന് ലോകാരോഗ്യ സംഘടന. വേള്‍ഡ് ഹെല്‍ത്ത് ഓര്‍ഗനൈസേഷന്‍(ഡബ്ല്യു.എച്ച്.ഒ) ഡയരക്ടര്‍ ജനറല്‍ ടെഡ്രോസ് അദാനോം ഗെബ്രയേസസ് ആണ് ഇക്കാര്യം വെളിപ്പെടുത്തിയത്.

ദക്ഷിണ ഗസ്സയിലെ മെഡിക്കല്‍ സംഭരണകേന്ദ്രത്തില്‍നിന്നുള്ള സാധനങ്ങള്‍ 24 മണിക്കൂറിനകം നീക്കംചെയ്യണമെന്ന് ആവശ്യപ്പെട്ട് ഇസ്‌റാഈല്‍ ഡിഫന്‍സ് ഫോഴ്‌സസിന്റെ ഒരു അറിയിപ്പ് ഡബ്ല്യു.എച്ച്.ഒയ്ക്ക് കിട്ടിയതായാണ് അദ്ദേഹത്തിന്റെ വെളിപെടുത്തല്‍. കരയാക്രമണത്തില്‍ ഇതു നശിക്കുമെന്നു പറഞ്ഞാണ് മുന്നറിയിപ്പെന്നും 'എക്‌സ്' പോസ്റ്റില്‍ ടെഡ്രോസ് പറയുന്നു.

Today, @WHO received notification from the Israel Defense Forces that we should remove our supplies from our medical warehouse in southern Gaza within 24 hours, as ground operations will put it beyond use.

We appeal to #Israel to withdraw the order, and take every possible…

— Tedros Adhanom Ghebreyesus (@DrTedros) December 4, 2023

ഉത്തരവ് പിന്‍വലിക്കണമെന്നും അദ്ദേഹം ഇസ്‌റാഈലിനോട് ആവശ്യപ്പെട്ടു. സിവിലിയന്മാരെയും ആശുപത്രികളും മാനുഷികസഹായ കേന്ദ്രങ്ങളും ഉള്‍പ്പെടെയുള്ള സിവിലിയന്‍ കെട്ടിടങ്ങളും സംരക്ഷിക്കാന്‍ ആവശ്യമായ നടപടികളെല്ലാം സ്വീകരിക്കണമെന്നും ഡബ്ല്യു.എച്ച്.ഒ തലവന്‍ ആവശ്യപ്പെട്ടു.

നിരന്തരമുള്ള ഇസ്‌റാഈല്‍ ആക്രമണത്തെ തുടര്‍ന്ന് ആയിരക്കണക്കിന് ഫലസ്തീനികള്‍ക്ക് ആരോഗ്യസേവനങ്ങള്‍ നിലയ്ക്കുമെന്നും ഡബ്ല്യു.എച്ച്.ഒ മുന്നറിയിപ്പ് നല്‍കുന്നു. ഗസ്സയില്‍ പ്രവര്‍ത്തിച്ചുവന്നിരുന്ന 36 ആശുപത്രികളില്‍ പകുതിയും കഴിഞ്ഞ 60 ദിവസത്തിനിടെ പ്രവര്‍ത്തനരഹിതമായിട്ടുണ്ട്.

എന്നാല്‍, ഫലസ്തീനിലെ കാര്യങ്ങളുടെ ഏകീകരണത്തിന്റെ ചുമതലയുള്ള കോഗാട്ട് എന്ന പേരിലുള്ള ഇസ്‌റാഈല്‍ വിഭാഗം ടെഡ്രോസിന്റെ വെളിപ്പെടുത്തല്‍ നിഷേധിച്ചിട്ടുണ്ട്.