ഉടമസ്ഥര്‍ മാറി; ഇനി ചെറിയ വിലക്ക് ഈ 'സൂപ്പര്‍കാറുകള്‍' കിട്ടില്ല

എം.ജി മോട്ടോഴ്‌സ് ഇന്ത്യന്‍ മാര്‍ക്കറ്റിലേക്ക് കുറഞ്ഞ കാലം കൊണ്ട് തന്നെ മികച്ച പ്രകടനം കാഴ്ചവെച്ച വാഹന ബ്രാന്‍ഡാണ്. ഹെക്ടര്‍ എന്ന എസ്.യു.വിയിലൂടെയായിരുന്നു ഇന്ത്യന്‍ മാര്‍ക്കറ്റില്‍ കമ്പനി തങ്ങളുടെ വരവറിയിച്ചത്. ചൈനീസ് കമ്പനിയായSAIC ഗ്രൂപ്പിന്റെ ഉടമസ്ഥതയിലുള്ള എംജി മോട്ടോഴ്‌സിന് അതിന്റ പേരില്‍ നിരവധി വിമര്‍ശനങ്ങള്‍ ഏറ്റുവാങ്ങേണ്ടി വന്നെങ്കിലും ഇപ്പോള്‍ കമ്പനി ഇന്ത്യനായി മാറുകയാണ്. എം.ജി മോട്ടോഴ്‌സിന്റെ 35 ശതമാനത്തോളം ഓഹരി ജെഎസ്ഡബ്ല്യു സ്വന്തമാക്കിയതോടെയാണ് ഇന്ത്യന്‍ കമ്പനിയാവാന്‍ എം.ജി മോട്ടോഴ്‌സ് തയ്യാറെടുക്കുന്നത്.ജെഎസ്ഡബ്ല്യു ഗ്രൂപ്പിന്റെ സജ്ജന്‍ ജിന്‍ഡാലും SAIC മോട്ടോര്‍ കോര്‍പ്പറേഷനും എംജി മോട്ടോര്‍ ഇന്ത്യ ഉള്‍പ്പെടുന്ന സഖ്യത്തിനുള്ള കരാര്‍ വ്യവസ്ഥകള്‍ അന്തിമമാക്കിയിട്ടുണ്ട്.

എന്നാല്‍ ഉടമസ്ഥര്‍ മാറുന്നതോടെ കമ്പനി തങ്ങള്‍ പുറത്തിറക്കുന്ന വാഹനങ്ങള്‍ക്ക് വില വര്‍ദ്ധിപ്പിക്കും.2024 ജനുവരി മുതല്‍ തങ്ങളുടെ ലൈനപ്പിലെ എല്ലാ മോഡലുകള്‍ക്കും വില വര്‍ധിപ്പിക്കുമെന്ന കമ്പനിയുടെ തീരുമാന പ്രകാരമാണ് വില വര്‍ദ്ധന നിലവില്‍ വരുന്നത്.മൊത്തം പണപ്പെരുപ്പവും ചരക്ക് വില വര്‍ധനയും കാരണം വര്‍ധിച്ചുവരുന്ന ചെലവുകളുമായി പൊരുത്തപ്പെടാനാണ് ചെറിയൊരു വില വര്‍ധനവ് നടപ്പിലാക്കാന്‍ പോവുന്നതെന്നാണ് കമ്പനി വൃത്തങ്ങള്‍ സൂചന നല്‍കിയിരിക്കുന്നത്. എന്നാല്‍ 2023 ഡിസംബര്‍ അവസാനത്തോടെ പ്രത്യേക വര്‍ഷാവസാന ഓഫറുകള്‍ പ്രഖ്യാപിക്കുമെന്നും ബ്രാന്‍ഡ് വ്യക്തമാക്കിയിട്ടുണ്ട്.

ഇന്ത്യയും ചൈനയും തമ്മിലുള്ള അതിര്‍ത്തി തര്‍ക്കങ്ങളെ തുടര്‍ന്ന് ഉടലെടുത്ത സംഘര്‍ഷങ്ങള്‍ കാരണം എംജി മോട്ടോര്‍ ഇന്ത്യയുടെ വിപുലീകരണ പദ്ധതികള്‍ വൈകിയിരുന്നു. ഇതിന്‍ പ്രകാരമാണ് ഓഹരി വിറ്റഴിച്ച് കമ്പനിയുടെ വളര്‍ച്ചക്ക് സഹായകരമാവുന്ന നടപടി സ്വീകരിക്കാന്‍ SAIC തീരുമാനമെടുത്തത്.2019ല്‍ ഇന്ത്യന്‍ മാര്‍ക്കറ്റിലേക്ക് അരങ്ങേറ്റം കുറിച്ച എം.ജി മോട്ടോഴ്‌സിന്
ഹെക്ടര്‍ പ്ലസ്, ZS ഇവി, ഗ്ലോസ്റ്റര്‍, ആസ്റ്റര്‍, കോമറ്റ് ഇ.വി മുതലായ വാഹന മോഡലുകളാണ് നിലവിലുള്ളത്.

Content Highlights:mg becoming more expensive in future