ലണ്ടന്‍: പാന്‍ഡോറ പേപ്പറുകളില്‍ പ്രത്യക്ഷ നികുതി ബോര്‍ഡ് ചെയര്‍മാന്റെ നേതൃത്വത്തില്‍ അന്വേഷണം. ആര്‍.ബി.ഐ, ഇഡി, ഫിനാന്‍ഷ്യല്‍ ഇന്റലിജന്‍സ് യൂണിറ്റും അന്വേഷണ സംഘത്തിലുണ്ട്.

അനില്‍ അംബാനി, സച്ചിന്‍ ടെണ്ടുല്‍ക്കര്‍, നീരവ് മോദിയുടെ സഹോദരി ഉള്‍പ്പെടെ 300ലേറെ ഇന്ത്യക്കാര്‍ക്ക് വിദേശത്ത് അനധികൃത സ്വത്തുള്ളതായി പാന്‍ഡൊറ രഹസ്യരേഖകളില്‍ പറയുന്നു. ബ്രിട്ടിഷ് കോടതി പാപ്പരായി പ്രഖ്യാപിച്ച അനില്‍ അംബാനി 18 കമ്പനികളിലായി വിദേശത്ത് നിക്ഷേപം നടത്തി നികുതി വെട്ടിച്ചതായാണ് റിപ്പോര്‍ട്ടിലുള്ളത്.

കള്ളപ്പണ നിക്ഷേപത്തെക്കുറിച്ചുള്ള പാനമ രേഖകള്‍ പുറത്തുവന്നതിന് പിന്നാലെ സച്ചിന്‍ വിദേശത്തുള്ള നിക്ഷേപം പിന്‍വലിക്കാന്‍ ശ്രമിച്ചെന്നും പാന്‍ഡൊറ പേപ്പറില്‍ പറയുന്നുണ്ട്. ഇന്ത്യന്‍ എക്‌സ്പ്രസ് ഉള്‍പ്പെടെ 140ലധികം മാധ്യമസ്ഥാപനങ്ങളുമായി സഹകരിച്ച് വാഷിങ്ടണ്‍ കേന്ദ്രീകരിച്ചുള്ള ഇന്റര്‍നാഷനല്‍ കണ്‍സോര്‍ഷ്യം ഓഫ് ഇന്‍വെസ്റ്റിഗേറ്റീവ് ജേണലിസ്റ്റ്‌സാണ് വിവരങ്ങള്‍ പുറത്തുവിട്ടത്.