കൊച്ചി: പ്രശസ്ത കാര്‍ട്ടൂണിസ്റ്റ് യേശുദാസന്‍ വിടവാങ്ങി. കൊവിഡ് ബാധിതനായി ചികില്‍സയിലിരിക്കെയായിരുന്നു പുലര്‍ച്ചെ 3.30 ഓടെ മരണം സംഭവിച്ചത്. കൊച്ചിയിലെ സ്വകാര്യ ആശുപത്രിയില്‍ ചികില്‍സയിലായിരുന്ന യേശുദാസന്‍ ഒരാഴ്ച മുന്‍പ് കൊവിഡ് നെഗറ്റീവ് ആയിരുന്നു. കേരള കാര്‍ട്ടൂണ്‍ അക്കാദമിയുടെ സ്ഥാപക അധ്യക്ഷനായ യേശുദാസന്‍ കേരള ലളിതകലാ അക്കാദമിയുടെ ഉപാധ്യക്ഷനും അധ്യക്ഷനുമായിരുന്നു.

1938 മാവേലിക്കരയ്ക്ക് അടുത്തുള്ള ഭരണിക്കാവിലാണ് ജനിച്ചത്. മലയാളത്തില്‍ കാര്‍ട്ടൂണുകളെ ജനകീയമാക്കി അദ്ദേഹം. കേരളത്തിലെ ആദ്യത്തെ പോക്കറ്റ് കാര്‍ട്ടൂണ്‍ രചിയിതാവാണ്. ജനയുഗം ദിനപത്രത്തില്‍ ഇദ്ദഹേഹം അവതരിപ്പിച്ച 'കിട്ടുമ്മാവന്‍' ആണ് ആദ്യത്തെ'പോക്കറ്റ്' കാര്‍ട്ടൂണ്‍. മലയാള മനോരയിലെ 'പൊന്നമ്മ സൂപ്രണ്ട്' 'ജൂബാ ചേട്ടന്‍' വനിതയിലെ 'മിസ്സിസ് നായര്‍'എന്നിവയുടെയും ശില്‍പിയായിരുന്നു അദ്ദേഹം. അരനൂറ്റാണ്ടോളം മാധ്യമ രംഗത്ത് പ്രവര്‍ത്തിച്ച അദ്ദേഹം മെട്രൊ വാര്‍ത്ത, ദേശാഭിമാനി എന്നീ ദിനപത്രങ്ങളിലും പ്രവര്‍ത്തിച്ചിട്ടുണ്ട്.