മട്ടാഞ്ചേരി: 'ഹെല്‍മറ്റ് അണിയൂ... മത്സരയോട്ടം ഒഴിവാക്കു...' സുരക്ഷാ യാത്ര ഒരുക്കുവെന്ന സന്ദേശവുമായി ഇരുചക്രവാഹന റൈഡര്‍ സംഘം കൊച്ചിയിലെത്തി.
മൈസൂരില്‍ നിന്ന് കൊച്ചിക്കും തിരിച്ചുമുള്ള ബുള്ളറ്റ് റൈഡര്‍ സംഘത്തിന് കൊച്ചിയില്‍ സ്വീകരണം നല്‍കി. കൊച്ചി, മുംബൈ, മൈസൂര്‍ ബുള്ളറ്റ് റൈഡര്‍ സംഘത്തിന്റെ കുട്ടായ്മയില്‍ റോഡ് സുരക്ഷാ കവചങ്ങളുമായി വാഹന ഡ്രൈവിങ്ങ് എന്ന സന്ദേശ ബോധവല്‍ക്കരണവും നടത്തി.
മൈസൂരില്‍ നിന്ന് വെള്ളിയാഴ്ച പുറപ്പെട്ട റൈഡര്‍ സംഘം തമിഴ്‌നാട് വഴി 480 കിലോമീറ്റര്‍ സഞ്ചരിച്ച് ശനിയാഴ്ച കൊച്ചിയിലെത്തി.
മട്ടാഞ്ചേരിഫോര്‍ട്ടുകൊച്ചി തുടങ്ങിയ വിവിധ ടുറിസ്റ്റ് സ്ഥലങ്ങള്‍ സന്ദര്‍ശിച്ച് സുരക്ഷാ സന്ദേശ പ്രചരണം നടത്തി. ഞായറാഴ്ച രാവിലെ സംഘം മടക്കയാത്രയും തുടങ്ങി.
മൂന്ന് വനിതകളടക്കം 20 അംഗ സംഘമാണ് കൊച്ചിയിലെത്തിയത്. മൈസൂരിലെ റോഡ് സ്റ്റാന്‍ലെസ്സ് റൈഡര്‍ ക്ലബ്ബിലെ അംഗങ്ങളായ രഘു ഗൗഡ സതീശ്, നരസിംഹന്‍,സാഗര്‍ നരസിംഹ, ചൈതന്യമൂര്‍ത്തി എന്നിവരാണ് റൈഡര്‍ യാത്രക്ക് നേതൃത്വം നല്‍കുന്നത്.
കവിത സതീശ്,അനന്യ അഖിലേഷ്, സമന്വിതറാവു എന്നിവരാണ് സംഘത്തിലെ വനിതകള്‍. മുംബൈയില്‍ നിന്ന് റോസ്സ്റ്റാന്‍ലിയസ് റൈഡര്‍ ക്ലബ്ബിലെ ഏട്ട് അംഗങ്ങള്‍, മൈസൂര്‍ എന്‍ഫീല്‍ഡ് മോന്‍സ്റ്റേഴ്‌സിലെ 15 അംഗങ്ങള്‍ എന്നിവര്‍ക്കൊപ്പം എന്‍ഫില്‍ഡ് കൊച്ചി റൈഡിംഗ് ക്ലബ്ബ് അംഗങ്ങളുമായി നടന്ന കുട്ടായ്മ ആഘോഷ ലഹരിയിലായി. ഗുജറാത്തി റോഡിലെ കോളനിയില്‍ നടന്ന കൂട്ടായ്മയ്ക്ക് കൊച്ചി അംഗം ഡാവല്‍ ദിനേശ്കുവാല്‍ നേതൃത്വം നല്‍കി.
രാമേശ്വരം ,ഗോവ എന്നിവയ്ക്ക് ശേഷമാണ് റൈഡര്‍ സംഘം കൊച്ചി യാത്ര നടത്തുന്നത്. ബൂട്ടാനാണ് അടുത്ത യാത്രാ ലക്ഷ്യമെന്ന് സതീശ് നരസിംഹന്‍ പറഞ്ഞു.