ദുബൈ: ടി 20 ലോകകപ്പില്‍ ഇന്ന് ഇന്ത്യപാകിസ്താന്‍ പോര്. രാത്രി ഏഴരയ്ക്ക് ദുബൈയിലാണ് മത്സരം. ക്രിക്കറ്റ്‌ലോകം കാത്തിരിക്കുന്ന ഇന്ത്യപാക് പോരാട്ടം തന്നെയാണ് ഇന്നത്തെ പ്രധാന മത്സരങ്ങളിലൊന്ന്. ഏറെകാലത്തിന് ശേഷമാണ് ഇന്ത്യയും പാകിസ്താനും ക്രിക്കറ്റില്‍ നേര്‍ക്കുനേര്‍ വരുന്നത്.

ഇന്ത്യയിലേയും പാകിസ്താനിലേയും മുന്‍താരങ്ങളുടെ വാക്‌പോരിനിടെയാണ് ടി20 ക്രിക്കറ്റിലെ മികച്ച പോരാട്ടം നടക്കുന്നത്. ടിക്കര്‌റുകള്‍ വില്‍പന തുടങ്ങിയ അന്നുതന്നെ ഇന്ത്യ പാക് മത്സരത്തിന്റെ ടിക്കറ്റുകള്‍ വിറ്റു തീര്‍ന്നിരുന്നു.

ചിരവൈരികളായ പാകിസ്താനുമായുള്ള മത്സരത്തില്‍ ചരിത്രം ഇന്ത്യക്കൊപ്പമാണ്. ട്വന്റി 20 ലോകകപ്പില്‍ അഞ്ച് തവണ ഏറ്റുമുട്ടിയപ്പോഴും വിജയം ഇന്ത്യക്കൊപ്പമായിരുന്നു. പ്രഥമ ട്വന്റി 20 ലോകകപ്പിന്റെ കലാശപ്പോരില്‍ ഇന്ത്യ കിരീടം ചൂടിയതും പാകിസ്താനെ വീഴ്ത്തിയായിരുന്നു. റാങ്കിങില്‍ മൂന്നാം സ്ഥാനത്തുള്ള പാകിസ്ഥാനെക്കാള്‍ ഒരു പടി മുകളിലാണ് ഇന്ത്യ. ടി20യില്‍ അഞ്ചും ഏകദിന ലോകകപ്പുകളില്‍ ഏഴും തവണയാണ് ഇരുടീമുകളും കൊമ്പു കോര്‍ത്തിട്ടുള്ളത്. ടി20 ഏകദിന ലോകകപ്പുകളിലായി 12 തവണ ഏറ്റുമുട്ടിയപ്പോഴും ജയം ഇന്ത്യക്കൊപ്പമായിരുന്നു.

ഇത്തവണയും മികച്ച പ്രതീക്ഷയിലാണ് ഇന്ത്യയും. സന്നാഹ മത്സരത്തില്‍ രണ്ടിലും മികച്ച ജയം സ്വന്തമാക്കിയ ഇന്ത്യ ഇന്നത്തെ ഇന്നത്തെ മത്സരം അനായാസം സ്വന്തമാക്കാമെന്ന പ്രതീക്ഷയിലാണ്.