സ്വന്തം ലേഖകന്‍
കൊച്ചി: പുരാവസ്തു തട്ടിപ്പുകേസ് പ്രതി മോന്‍സണ്‍ മാവുങ്കലുമായുള്ള ബന്ധത്തിന്റെ പേരില്‍ ഡി.ജി.പി അനില്‍കാന്തിന്റെ മൊഴിയെടുത്തു. ഇതാദ്യമായാണ് ഒരു തട്ടിപ്പുകേസുമായി ബന്ധപ്പെട്ട് സംസ്ഥാന പൊലിസ് മേധാവിയുടെ മൊഴി എടുക്കുന്നത്.
ക്രൈം ബ്രാഞ്ച് മേധാവി എ.ഡി.ജി.പി. എസ്.ശ്രീജിത്ത്, അന്വേഷണ ഉദ്യോഗസ്ഥന്‍ എം.ജെ സോജന്‍ എന്നിവര്‍ അനില്‍കാന്തിനെ സന്ദര്‍ശിച്ചാണ് മൊഴിയെടുത്ത്. അനില്‍കാന്ത് ഡി.ജി.പി ആയശേഷം മോന്‍സണ്‍ പൊലിസ് ആസ്ഥാനത്ത് കൂടിക്കാഴ്ച നടത്തുകയും ഉപഹാരം നല്‍കുകയും ചെയ്തിരുന്നു. ഇയാള്‍ക്കെതിരേ തട്ടിപ്പുകേസുകളില്‍ അന്വേഷണം നടക്കുന്നതിനിടെയാണിത്. കൂടാതെ മോന്‍സണ്‍ സംശയാസ്പദമായ വ്യക്തിയാണെന്ന ഇന്റലിജന്‍സ് റിപ്പോര്‍ട്ടുമുണ്ടായിരുന്നു. ഇയാള്‍ ഡി.ജി.പിക്ക് ഉപഹാരം കൈമാറുന്നതിന്റെ ചിത്രങ്ങള്‍ സാമൂഹ്യമാധ്യമങ്ങള്‍ വഴി പുറത്തുവന്നിരുന്നു. ഇവ സംബന്ധിച്ച കൂടുതല്‍ വിവരങ്ങളാണ് ഡി.ജി.പിയില്‍ നിന്നു ക്രൈംബ്രാഞ്ച് തേടിയത്.

പ്രവാസി മലയാളി ഫെഡറേഷന്‍ എന്ന സംഘടനയുടെ പ്രതിനിധി എന്ന നിലയിലാണ് അയാളെ താന്‍ കണ്ടതെന്ന് ഡി.ജി.പി. അന്വേഷണ ഉദ്യോഗസ്ഥരോട് വിശദീകരിച്ചു. മോന്‍സണ്‍ ഉള്‍പ്പെടെ ഫെഡറേഷന്‍ ഭാരവാഹികളായ ആറുപേരാണ് തന്നെ കാണാന്‍ വന്നതെന്നും അദ്ദേഹം വ്യക്തമാക്കി. കൂടിക്കാഴ്ചക്കിടെയാണ് മോന്‍സണ്‍ ഡി.ജി.പിക്ക് ഉപഹാരം നല്‍കിയത്. മറ്റ് ഫെഡറേഷന്‍ ഭാരവാഹികളുംകൂടി നിന്നാണ് ചിത്രം എടുത്തതും. എന്നാല്‍ മോന്‍സണും ഡി.ജി.പിയും മാത്രമുള്ള ചിത്രമാണ് പുറത്തുവന്നത്. മറ്റ് ഭാരവാഹികളുടെ ചിത്രം ക്രോപ് ചെയ്തുമാറ്റിയ ശേഷമുള്ള ഈ ചിത്രത്തിനു പിന്നില്‍ മോന്‍സണ്‍ ആണെന്നാണ് ക്രൈംബ്രാഞ്ച് കരുതുന്നത്. ചിത്രം സാമൂഹിക മാധ്യമങ്ങളില്‍ പ്രചരിച്ചതോടെ താന്‍ ഇടപെട്ട് നീക്കിയെന്നും ഡി.ജി.പി മൊഴി നല്‍കി. അതിനിടെ പേരൂര്‍ക്കട പൊലിസ് ക്ലബ്ബിലും മോന്‍സണ്‍ രണ്ടു തവണ തങ്ങിയതായി അന്വേഷണസംഘം കണ്ടെത്തി. രണ്ടു തവണയും ട്രാഫിക് ഐ.ജി. ലക്ഷ്മണയുടെ അതിഥിയായാണ് മോന്‍സണ്‍ താമസിച്ചത്.
ഇതുസംബന്ധിച്ച് വിശദമായ അന്വേഷണം നടത്തും. മോന്‍സണുമായി നിരവധിതവണ ഫോണില്‍ ബന്ധപ്പെട്ടതും മോന്‍സണെതിരേ പന്തളം ശ്രീവത്സം ഗ്രൂപ്പ് നല്‍കിയതടക്കമുള്ള പരാതികളിലെ അന്വേഷണം അട്ടിമറിക്കാന്‍ ശ്രമിച്ചതും അടക്കം നിരവധി ആരോപണങ്ങള്‍ ലക്ഷ്മണയ്‌ക്കെതിരേയണ്ട്.

ഇദ്ദേഹത്തോടൊപ്പം മുന്‍ ഡി.ജി.പി. ലോക്‌നാഥ് ബഹ്‌റ, എ.ഡി.ജി.പി. മനോജ് എബ്രഹാം എന്നിവരുടെ മൊഴിയും ക്രൈംബ്രാഞ്ച് കഴിഞ്ഞ ദിവസം രേഖപ്പെടുത്തി. കേസുമായി ബന്ധപ്പെട്ട വിശദ റിപ്പോര്‍ട്ട് ക്രൈം ബ്രാഞ്ച് ഇന്ന് ഹൈക്കോടതിയില്‍ സമര്‍പ്പിക്കും എന്നാണ് വിവരം.