ന്യൂഡല്‍ഹി: രാജ്യത്തെ അന്നദാതാക്കളോടുള്ള കേന്ദ്ര നിലപാടിനെതിരെ രൂക്ഷ വിമര്‍ശനവുമായി മേഘാലയ ഗവര്‍ണര്‍ സത്യപാല്‍ മാലിക്. കര്‍ഷക സമരവും സെന്‍ട്രല്‍ വിസ്ത പദ്ധതിയും സൂചിപ്പിച്ചുകൊണ്ടായിരുന്നു സത്യപാല്‍ മാലികിന്റെ വിമര്‍ശനം.

കര്‍ഷകരെ പിന്തുണച്ചതിന്റെ ഭാഗമായി കേന്ദ്രം ആവശ്യപ്പെട്ടാല്‍ ഗവര്‍ണര്‍ സ്ഥാനം ഒഴിയാന്‍ തയ്യാറാണെന്ന് സത്യപാല്‍ മാലിക് തുറന്നടിച്ചു. കര്‍ഷക വിഷയത്തില്‍ താനെന്തെങ്കിലും പ്രതികരിച്ചാല്‍ അത് വിവാദങ്ങള്‍ക്ക് വഴിവെക്കുമെന്നും സത്യപാല്‍ മാലിക് വ്യക്തമാക്കി.

ഒരു പട്ടി ചത്താല്‍ പോലും അനുശോചിക്കുന്ന ഡല്‍ഹിയിലെ നേതാക്കള്‍ കര്‍ഷക സമരത്തിനിടെ 600 കര്‍ഷകര്‍ മരിച്ചിട്ടും ദു:ഖം പ്രകടിപ്പിക്കാന്‍ പോലും തയാറായിട്ടില്ലെന്ന് അദ്ദേഹം പറഞ്ഞു. കര്‍ഷകരോട് ആഭിമുഖ്യമുള്ളവര്‍ സര്‍ക്കാറിലുണ്ട്. എന്നാല്‍ ഒന്നു രണ്ടാളുകളുടെ കടുംപിടുത്തമാണ് പ്രശ്‌നങ്ങളുടെ കാരണം- അദ്ദേഹം ചൂണ്ടിക്കാട്ടി.

സമരം ചെയ്യുന്ന കര്‍ഷകര്‍ ഡല്‍ഹിയില്‍ നിന്ന് വെറും കൈയ്യോടെ മടങ്ങില്ലെന്നും വിജയം നേടുമെന്നും അദ്ദേഹം പറഞ്ഞു.അനീതി സംഭവിച്ചുകൊണ്ടിരുന്നല്‍, ഒരു ദിവസം ജനങ്ങള്‍ പ്രതികരിക്കുമെന്നും അദ്ദേഹം കൂട്ടിച്ചേര്‍ത്തു.

കേന്ദ്രസര്‍ക്കാറിനെ നയിക്കുന്നവരുടെ കോര്‍പറേറ്റ് ചങ്ങാത്തത്തെയും സത്യപാല്‍ തുറന്നുകാട്ടി. പുതിയ കാര്‍ഷിക നിയമങ്ങള്‍ പാര്‍ലമെന്റ് പാസാക്കുന്നതിന് മുന്‍പ് തന്നെ ഹരിയാനയിലെ പാനിപത്തില്‍ അദാനി ഗ്രൂപ്പ് ഗോഡൗണ്‍ സ്ഥാപിച്ചിരുന്നുവെന്ന് അദ്ദേഹം ചൂണ്ടികാട്ടി.

പുതിയ പാര്‍ലമെന്റ് കെട്ടിടമടങ്ങുന്ന സെന്‍ട്രല്‍ വിസ്ത പദ്ധതിക്കെതിരെയും സത്യപാല്‍ വിമര്‍ശനമുന്നയിച്ചു. രാജ്യത്തിന് ഗുണമേന്‍മയുള്ള വിദ്യാഭ്യാസത്തിന്റെ കുറവാണുള്ളതെന്നും പുതിയ പാര്‍ലമെന്റിന് പകരം ലോക നിലവാരമുള്ള കോളേജ് സ്ഥാപിക്കുന്നതാണ് നല്ലതെന്നും അദ്ദേഹം പരിഹസിച്ചു.

ബി.ജെ.പി നേതാവായിരുന്ന സത്യപാല്‍ മാലിക് നേരത്തെയും കേന്ദ്ര സര്‍ക്കാരിനെതിരെ വമര്‍ശനങ്ങളുമായി രംഗത്തെത്തിയിരുന്നു. കര്‍ഷകരുടെ ആവശ്യങ്ങള്‍ നടപ്പാക്കിയില്ലെങ്കില്‍ ബി.ജെ.പി ഇനി അധികാരത്തില്‍ തിരിച്ചുവരില്ലെന്ന മാലികിന്റെ പ്രസ്താവന വലിയ വിവാദങ്ങള്‍ക്ക് വഴിവെച്ചിരുന്നു.