പാരിസ്
റാഫേൽ യുദ്ധവിമാന ഇടപാടിൽ കോഴ നൽകിയതിനു തെളിവുലഭിച്ചിട്ടും അന്വേഷണം നടത്താൻ സി.ബി.ഐ തയാറായില്ലെന്ന ഫ്രഞ്ച് മാധ്യമത്തിൻ്റെ വെളിപ്പെടുത്തൽ കേന്ദ്ര സർക്കാരിനെ സമ്മർദത്തിലാക്കുന്നു. കേന്ദ്ര അന്വേഷണ ഏജൻസികളുടെ വിശ്വാസ്യതയാണ് ഇവിടെ പൊളിഞ്ഞുവീഴുന്നത്. 65 കോടി രൂപ ഇടനിലക്കാരനായ സൂഷെൻ ഗുപ്തയ്ക്ക് ലഭിച്ചെന്നും ഇതിൻ്റെ തെളിവുകൾ 2018ൽ തന്നെ സി.ബി.ഐക്കും ഇ.ഡിക്കും ലഭിച്ചിരുന്നുവെന്നുമാണ് ഫ്രഞ്ച് അന്വേഷണാത്മക ജേണലായ മീഡിയപാർട്ട് റിപ്പോർട്ടിൽ പറയുന്നത്. കേന്ദ്രസർക്കാർ അന്വേഷണ ഏജൻസികളെ എതിരാളികൾക്കെതിരേ ഉപയോഗിക്കുന്നതായി ആരോപണം നിലനിൽക്കെയാണ് പുതിയ വെളിപ്പെടുത്തൽ.

പാകിസ്താൻ, ചൈന എന്നിവ ഉയർത്തുന്ന ഭീഷണി മറികടക്കാനാണ് കാലാവധി കഴിഞ്ഞ യുദ്ധവിമാനങ്ങൾക്കു പകരം ഫ്രഞ്ച് കമ്പനിയായ ദസോ ഏവിയേഷനിൽ നിന്ന് റാഫേൽ യുദ്ധവിമാനങ്ങൾ വാങ്ങാൻ കേന്ദ്രസർക്കാർ തീരുമാനിച്ചത്.
680 കോടി രൂപയാണ് ഒരു റഫേൽ യുദ്ധവിമാനത്തിൻ്റെ വില. 2016 സെപ്റ്റംബറിലാണ് ഇന്ത്യയും ഫ്രാൻസും 787 കോടി യൂറോയുടെ (59,000 കോടി രൂപ) ഇടപാടിൽ ഒപ്പുവച്ചത്. 36 വിമാനങ്ങളാണ് കരാർ പ്രകാരം ഇന്ത്യ വാങ്ങുന്നത്. കഴിഞ്ഞവർഷം ജൂലൈ 29ന് അഞ്ച് റാഫേൽ വിമാനങ്ങളടങ്ങിയ ആദ്യ ശ്രേണി ഇന്ത്യയിലെത്തി. ഇതിനകം 26 റാഫേൽ വിമാനങ്ങൾ ഇന്ത്യയിലെത്തിയിട്ടുണ്ട്.

റഷ്യയുടെ മിഗ് വിമാനങ്ങളായിരുന്നു ഇതുവരെ ഇന്ത്യൻ വ്യോമസേനയുടെ കരുത്ത്. ആ സ്ഥാനത്തേക്കാണ് റാഫേൽ കടന്നുവന്നത്. വ്യോമസേന ഏറെകാലമായി ആവശ്യപ്പെട്ടുവന്ന വിവിധോദ്ദേശ്യ വിമാനങ്ങളുടെ ഗണത്തിലാണ് റാഫേൽ ഉൾപ്പെടുന്നത്. 80കളിൽ ഇന്ത്യൻ വ്യോമസേനയുടെ ഭാഗമായ മിറാഷ് 2000 യുദ്ധവിമാനം വികസിപ്പിച്ചതും ദസോ ആയിരുന്നു. ആണവ പോർമുനകൾ ഘടിപ്പിച്ച മിസൈലുകൾ വഹിക്കുന്ന മിറാഷാണ് 1999ലെ കാർഗിൽ യുദ്ധത്തിലുപയോഗിച്ചത്.
യു.എസിൻ്റെ എഫ്-16, എഫ്-18, റഷ്യയുടെ മിഗ്-35, ഇ.യു രാജ്യങ്ങളുടെ യൂറോ ഫൈറ്റർ എന്നിവയെ അവഗണിച്ചാണ് റാഫേൽ വാങ്ങാൻ സർക്കാർ തീരുമാനിച്ചത്. എന്നാൽ, ഇതിന് അവയുടെ ആക്രമണശേഷിയുണ്ടോ എന്നതിൽ സംശയം നിലനിൽക്കുന്നു. നിലവിൽ ഫ്രാൻസിനെ കൂടാതെ ഈജിപ്ത്, ഖത്തർ എന്നീ രാജ്യങ്ങൾ മാത്രമേ റാഫേൽ ഉപയോഗിക്കുന്നുള്ളൂ.

റാഫേൽ ഇടപാടിൽ അഴിമതി നടന്നതായി കണ്ടെത്തിയിട്ടില്ലെന്ന് 2018 ഡിസംബർ 14ന് സുപ്രിം കോടതി വ്യക്തമാക്കിയിരുന്നു. കേസിൽ പുനരന്വേഷണം വേണമെന്ന് ആവശ്യപ്പെടുന്ന ഹരജികൾ 2019 നവംബർ 14ന് കോടതി തള്ളുകയും ചെയ്തു. എന്നാൽ, ഈവർഷം ജൂണിൽ റാഫേൽ ഇടപാടിൽ അഴിമതി നടന്നോയെന്ന് അന്വേഷിക്കാനായി ഫ്രഞ്ച് കോടതി ജുഡിഷ്യൽ അന്വേഷണം പ്രഖ്യാപിച്ചിരിക്കുകയാണ്. അന്വേഷണാത്മക ജേണലായ മീഡിയപാർട്ടിൻ്റെ കണ്ടെത്തലുകൾ പുറത്തുവന്ന സാഹചര്യത്തിലാണിത്.
റഫാൽ ഇടപാടിൽ അഴിമതി നടന്നിട്ടുണ്ടോയെന്ന് അന്വേഷിക്കണമെന്ന പരാതി സി.ബി.ഐ മുമ്പാകെ ഉണ്ടായിരിക്കെയാണ് 2018 ഒക്ടോബർ 11ന് ഇടനിലക്കാരന് കോഴ നൽകിയതിൻ്റെ രേഖകൾ സി.ബി.ഐക്കു കൈമാറിയത്. ഇ.ഡിക്കും ഇവ ലഭിച്ചിരുന്നു. എന്നിട്ടും ഇരു ഏജൻസികളും അന്വേഷണം നടത്താൻ തയാറായില്ലെന്നാണ് മീഡിയപാർട്ട് ആരോപിക്കുന്നത്. കോഴ കൈമാറിയ വിവരങ്ങൾ ലഭിച്ച് 14 ദിവസത്തിനകമാണ് അലോക് വർമയെ സി.ബി.ഐ ഡയരക്ടർ പദവിയിൽ നിന്നു മാറ്റിയത്. അർധരാത്രിയായിരുന്നു ഇതുസംബന്ധിച്ച ഉത്തരവിറങ്ങിയത്. ഇത് അന്വേഷണം നടക്കുന്നത് തടയാനായിരുന്നുവെന്ന് പ്രതിപക്ഷം ആരോപിച്ചിരുന്നു.