കോഴിക്കോട്: കോര്‍പറേഷനിലെ എടക്കാട് വാര്‍ഡ് ഇനി മാലിന്യമുക്തം. നിറവ് വേങ്ങേരിയുമായി സഹകരിച്ച് വാര്‍ഡില്‍ നിന്നും അജൈവ മാലിന്യങ്ങള്‍ അടക്കമുള്ള മാലിന്യങ്ങള്‍ നീക്കം ചെയ്തു.
വാര്‍ഡിലെ റസിഡന്‍സ് അസോസിയേഷനുകളുടെയും വിവിധ സംഘടനകളുടെയും സഹകരണത്തോടെ നാല് ലോറി നിറയെ മാലിന്യമാണ് സംസ്‌കരണ കേന്ദ്രത്തിലേക്ക് അയച്ചത്. ഒരുമാസം മുന്‍പ് കോ-ഓഡിനേഷന്‍ കമ്മിറ്റി രൂപീകരിച്ചാണ് മാലിന്യം ശേഖരിച്ചത്. ഇതിന്റെ ഭാഗമായി നിറവ് വേങ്ങേരിയുടെ പ്രതിനിധികള്‍ വാര്‍ഡിലെത്തി ക്ലാസെടുത്തു. മാലിന്യം നിറച്ച വാഹനം ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ.വി ബാബുരാജ് ഫ്‌ളാഗ് ഓഫ് ചെയ്തു. കൗണ്‍സിലര്‍ എം. ശ്രീജ അധ്യക്ഷയായി.