കൊച്ചി: കെ.പി.സി.സി വര്‍ക്കിങ് പ്രസിഡന്റും തൃക്കാക്കര എം.എല്‍.എയുമായ പി.ടി തോമസിന് വിട നല്‍കി രാഷ്ട്രീയ കേരളം. പൂര്‍ണ ഔദ്യോഗിക ബഹുമതികളോടെ രവിപുരം ശ്മശാനത്തില്‍ സംസ്‌കാരം നടന്നു. മക്കളായ വിവേകും വിഷ്ണുവും ചിതയ്ക്ക് തീക്കൊളുത്തിയത്. മുഖ്യമന്ത്രി ഉള്‍പ്പെടെയുള്ള രാഷ്ട്രീയ-സാംസ്‌കാരിക-സാമൂഹിക രംഗത്തെ പ്രമുഖര്‍ തൃക്കാക്കര കമ്യൂണിറ്റി ഹാളിലെത്തി അന്തിമോപചാരം അര്‍പ്പിച്ചു.

കോണ്‍ഗ്രസ് നേതാവ് രാഹുല്‍ ഗാന്ധി ഉള്‍പ്പെടെയുള്ളവര്‍ അന്തിമോപചാരം അര്‍പ്പിക്കാനെത്തി. പി.ടിയുടെ ആഗ്രഹപ്രകാരം മതാചാര ചടങ്ങുകളൊന്നും ഇല്ലാതെയായിരുന്നു സംസ്‌കാരം. പൊതുദര്‍ശന സമയത്തുടനീളം വയലാറിന്റെ ' ചന്ദ്രകളഭം ചാര്‍ത്തിയുറങ്ങും' എന്ന ഗാനം ചെറിയ ശബ്ദത്തില്‍ വച്ചിരുന്നു.

എറണാകുളം ടൗണ്‍ ഹാളിലും തൃക്കാക്കര മുനിസിപ്പല്‍ കമ്യൂണിറ്റി ഹാളിലും പൊതുദര്‍ശനത്തിന് വെച്ച മൃതദേഹത്തില്‍ ആദരാഞ്ജലി അര്‍പ്പിക്കാന്‍ ആയിരങ്ങളാണ് എത്തിയത്. പാലാരിവട്ടത്തെ വീട്ടിലും എറണാകുളം ഡി.സി.സി ഓഫിസായ ചൈതന്യയിലും എത്തിയവര്‍ ആദരമര്‍പ്പിച്ചതിന് ശേഷം പ്രത്യേക വാഹനത്തിലാണ് മൃതദേഹം ടൗണ്‍ ഹാളിലും ശ്മശാനത്തിലും എത്തിച്ചത്.