പാകിസ്താൻ: ഐസിസി ചാമ്പ്യൻസ് ട്രോഫി ഫൈനലിനെക്കുറിച്ച് വമ്പൻ പ്രവചനം നടത്തിയിരിക്കുകയാണ് മുൻ ഓസ്‌ട്രേലിയൻ താരം മൈക്കൽ ക്ലർക്ക്. ഫൈനലിൽ ഇന്ത്യയും ഓസ്‌ട്രേലിയയും തമ്മിലായിരിക്കുമെന്നും മത്സരത്തിൽ ഒരു റൺസിന്‌ ഓസ്ട്രേലിയയെ ഇന്ത്യ പരാജയപ്പെടുത്തുമെന്നുമാണ് ക്ലർക്കിന്റെ പ്രവചനം. റെവ്‌സ്പോർട്‌സിന് നൽകിയ അഭിമുഖത്തിലാണ് മുൻ ഓസ്‌ട്രേലിയൻ താരം പ്രവചനം നടത്തിയത്. 

ഓസ്ട്രേലിയ ചാമ്പ്യൻസ് ട്രോഫി ഫൈനൽ കളിക്കുമെന്ന് ഞാൻ കരുതുന്നു. ഇന്ത്യക്കെതിരെയായിരിക്കും ഓസ്ട്രേലിയ ഫൈനൽ കളിക്കുക. മത്സരത്തിൽ ഓസ്ട്രേലിയ വിജയിക്കണമെന്ന് ഞാൻ ആഗ്രഹിക്കുന്നു. എന്നാൽ ഇന്ത്യ ചാമ്പ്യൻസ് ട്രോഫി നേടുമെന്നാണ് എനിക്ക് തോന്നുന്നത്. കാരണം നിലവിലെ ലോകത്തിലെ ഏറ്റവും മികച്ചതും ഏകദിനത്തിലെ ഒന്നാം നമ്പർ ടീമുമാണ് ഇന്ത്യ. ഫൈനലിൽ ഓസ്‌ട്രേലിയക്കെതിരെ ഒരു റൺസിന് ഇന്ത്യ വിജയിക്കും.' മൈക്കൽ ക്ലർക്ക് പറഞ്ഞു.  

ഗ്രൂപ്പ് ഘട്ടത്തിൽ ആദ്യ രണ്ട് മത്സരങ്ങളും വിജയിച്ചുകൊണ്ട് നേരത്തെ തന്നെ രോഹിത് ശർമയും സംഘവും ചാമ്പ്യൻ ട്രോഫി സെമി ഫൈനലിലേക്ക് മുന്നേറിയിരുന്നു. ബംഗ്ലാദേശിനെയും പാകിസ്താനെയും കീഴടക്കിയാണ് ഇന്ത്യ സെമി ഫൈനൽ യോഗ്യത നേടിയത്. നാളെ നടക്കുന്ന മത്സരത്തിൽ ന്യൂസിലാൻഡിനെതിരെയാണ് ഇന്ത്യയുടെ അടുത്ത മത്സരം. ഈ മത്സരം വിജയിക്കുന്ന ടീം ഗ്രൂപ്പ് ചാമ്പ്യന്മാരാവും. 

മറുഭാഗത്ത് മൂന്ന് മത്സരങ്ങളിൽ ഒരു മത്സരം ഓസ്ട്രേലിയ വിജയിച്ചപ്പോൾ രണ്ട് മത്സരങ്ങൾ മഴമൂലം ഉപേക്ഷിക്കുകയും ചെയ്തു. ഇംഗ്ലണ്ടിനെതിരെ ആദ്യ മത്സരം വിജയിച്ചുകൊണ്ടാണ് ഓസീസ് ടൂർണമെന്റിലേക്ക് വരവറിയിച്ചത്. എന്നാൽ പിന്നീട് സൗത്ത് ആഫ്രിക്ക, അഫ്ഗാനിസ്ഥാൻ എന്നീ ടീമുകൾക്കെതിരെയുള്ള മത്സരങ്ങൾ മഴ മൂലം ഉപേക്ഷിക്കുകയും ചെയ്തു. അഫ്ഗാനെതിരെയുള്ള മത്സരം ഇന്നലെയായിരുന്നു നടന്നിരുന്നത്. മത്സരത്തിൽ ആദ്യം ബാറ്റ് ചെയ്ത അഫ്ഗാനിസ്ഥാൻ 273 റൺസിന് പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഓസ്ട്രേലിയൻ ഇന്നിങ്സ് 12.5 ഓവറിൽ ഒരു വിക്കറ്റ് നഷ്ടത്തിൽ 109 റൺസ് എന്ന നിലയിൽ നിൽക്കെ മഴ വില്ലനായി എത്തുകയായിരുന്നു.  

Michael Clarke Predicts 2025 ICC Champions Trophy Final