സ്വന്തം തട്ടകത്തില്‍ നടന്ന ഐ.എസ്.എല്ലിന്റെ പ്ലേ ഓഫ് മത്സരത്തില്‍ ആരാധകരെ നിരാശരാക്കാതെ എഫ്.സി ഗോവ. ഇന്നലെ നടന്ന മത്സരത്തില്‍ ചെന്നൈയിന്‍ എഫ്.സിയെ തോല്‍പിച്ച ഗോവ സെമിയിലേക്ക് ടിക്കറ്റുറപ്പിച്ചു. സ്വന്തം കാണികളുടെ മുന്നില്‍ മികച്ച നീക്കങ്ങളുമായി തുടങ്ങിയ ഗോവ ആദ്യപകുതിയില്‍ പഴുതടച്ച നീക്കങ്ങളുമായി ചെന്നൈയിന്റെ കോര്‍ട്ടില്‍ മികച്ച നീക്കങ്ങള്‍ നടത്തി.

ആദ്യ പകുതിയില്‍ ലഭിച്ച അവസരത്തിലെല്ലാം ചെന്നൈയിനും എതിര്‍ പോസ്റ്റ് ലക്ഷ്യമാക്കി കൗണ്ടര്‍ അറ്റാക്കുകളുമായി കളംനിറഞ്ഞു കളിച്ചു. എന്നാല്‍ 36ാം മിനുട്ടില്‍ എഫ്.സി ഗോവ ആദ്യ ഗോള്‍ നേടി. മുന്നേറ്റതാരം നോഹ സദോയി യുടെ ഗോളില്‍ എഫ്.സി ഗോവ മുന്നിലെത്തി. ഒരു ഗോള്‍ നേടിയതോടെ മത്സരത്തിന്റെ നിയന്ത്രണം ഏറ്റെടുത്ത ഗോവ ചെന്നൈയിന്റെ പോസ്റ്റിലേക്ക് ആക്രമണം ശക്തമാക്കി. പക്ഷെ, ഫിനിഷിങ്ങിലെ പോരായ്മ പലപ്പോഴും ഗോളെന്നുറച്ച അവസരങ്ങള്‍ നഷ്ടപ്പെടുത്തി. മികച്ചൊരു നീക്കത്തിനൊടുവില്‍ 45ാം മിനുട്ടില്‍ ഗോവ രണ്ടാം ഗോളും ചെന്നൈയിന്റെ വലയിലാക്കി. രണ്ട് ഗോളിന്റെ ലീഡ് സ്വന്തമാക്കി മത്സരത്തില്‍ ആധിപത്യം ഊട്ടിയുറപ്പിച്ചു.

എന്നാല്‍ ഒരു ഗോളടിച്ച് ഉടന്‍ തന്നെ ചെന്നൈയിന്‍ മറുപടി നല്‍കി. ആദ്യപകുതിയുടെ അധിക സമയത്ത് സന്ദര്‍ശകര്‍ ഒരു ഗോള്‍ മടക്കി. ലാസര്‍സിര്‍ കോവിച്ചായിരുന്നു ചെന്നൈയിനായി ഗോള്‍ നേടിയത്. പിന്നീട് സമനിലക്കായി ചെന്നൈയിന്‍ ശക്തമായ നീക്കങ്ങളുമായി ഗോവയുടെ പോസ്റ്റിലേക്ക് ഇരച്ചെത്തിയെങ്കിലും ഗോവ പ്രതിരോധം ശക്തമാക്കിയയോടെ ചെന്നൈയിന്റെ എല്ലാ ഗോള്‍ ശ്രമങ്ങളും പാഴായി.