കേരളത്തില്‍ വേനലവധിയായിട്ടും പത്തനംതിട്ടയിലെ ഇക്കോ ടൂറിസം കേന്ദ്രം ഗവി തുറന്നു കൊടുക്കാതെ കേരള ടൂറിസം വകുപ്പ്. കേരളത്തില്‍ മറ്റു വിനോദ സഞ്ചാര കേന്ദ്രങ്ങളിലേക്ക് സഞ്ചാരികളുടെ കുത്തൊഴുക്ക് തുടരുമ്പോഴാണ് ടൂറിസം വകുപ്പിന്റെ ഇത്തരമൊരു തീരുമാനം. മേഖലയില്‍ കാട്ടുതീ പടരാനുള്ള സാധ്യതയുണ്ടെന്ന് ചൂണ്ടിക്കാട്ടിയാണ് വകുപ്പിന്റെ വിലക്ക്.

എന്നാല്‍ മുമ്പൊരിക്കലും ഇത്തരത്തിലുള്ള നിയന്ത്രണം ഏര്‍പ്പെടുത്തിയിട്ടില്ലെന്ന് സഞ്ചാരികള്‍ പറയുന്നു. മാര്‍ച്ച് 11 മുതലാണ് ഗവിയിലേക്ക് സഞ്ചാരികള്‍ക്ക് അനിശ്ചിതകാലത്തേക്ക് വിലക്കേര്‍പ്പെടുത്തിയത്. എന്നാല്‍ മുന്‍പുള്ള സാഹചര്യമല്ല ഇപ്പോഴുള്ളതെന്നും ഇടയ്ക്കിടെ വേനല്‍ മഴ ലഭിക്കുന്നതിനാല്‍ കാട്ടുതീയുടെ സാധ്യത വളരെ കുറവാണെന്ന എതിരഭിപ്രായവും ഉയരുന്നുണ്ട്.

യഥാര്‍ത്ഥ പ്രശ്‌നം കാട്ടുതീ അല്ലെന്നും വനംവകുപ്പിന് സഞ്ചാരികളുടെ മേല്‍ വേണ്ടത്ര ശ്രദ്ധ നല്‍കാന്‍ കഴിയാത്തതും മറ്റു നിരീക്ഷണ സംവിധാനങ്ങളുടെ അപര്യാപ്തതയുമാണ് ഈ തീരുമാനത്തിന് പിന്നില്‍ എന്നാണ് ഇവര്‍ പറയുന്നത്. സഞ്ചാരികളുടെ എണ്ണത്തിന് ആനുപാതികമായി സുരക്ഷാ ഉദ്യോഗസ്ഥരെ ക്രമീകരിക്കാനോ വിന്യസിക്കാനോ ടൂറിസം വകുപ്പിന് കഴിയുന്നില്ല എന്ന പരാതി ഉയരുന്നുണ്ട്.