ഡല്‍ഹി: ഡല്‍ഹി വനിത കമീഷനിലെ 233 ജീവനക്കാരെ നീക്കി ലഫ്റ്റനന്റ് ഗവര്‍ണര്‍. ചട്ട വിരുദ്ധമായി നിയമിച്ചെന്ന് കാട്ടിയാണ് നടപടി. ലഫ്റ്റനന്റ് ഗവര്‍ണര്‍ വി.കെ സക്‌സേനയുടെ ഉത്തരവിന്റെ അടിസ്ഥാനത്തിലാണ് നടപടി. ഗവര്‍ണറുടെ അനുമതിയോടെ വനിത ശിശു വകുപ്പാണ് നടപടിയെടുത്തത്. ഗവര്‍ണര്‍ക്ക് ലഭിച്ച റിപ്പോര്‍ട്ടിന്റെ അടിസ്ഥാനത്തിലായിരുന്നു നടപടി. 

മുന്‍ ഡല്‍ഹി വനിതാ കമ്മിഷന്‍ അധ്യക്ഷ സ്വാതി മലിവാള്‍ നിയമിച്ച ജീവനക്കാരെയാണ് നീക്കം ചെയ്തത്. കരാറടിസ്ഥാനത്തില്‍ നിയമിച്ച ജീവനക്കാരെയാണ് പിരിച്ചുവിട്ടത്. കരാറടിസ്ഥാനത്തില്‍ ജീവനക്കാരെ നിയമിക്കാന്‍ വനിതാ കമ്മീഷന്‍ അധ്യക്ഷയ്ക്ക് അധികാരമില്ലെന്ന് ഉത്തരവില്‍ പറയുന്നു.

സ്വാതി മലിവാള്‍ ധനകാര്യ വകുപ്പിന്റെ അനുമതിയില്ലാതെയാണ് ജീവനക്കാരെ നിയമിച്ചതെന്ന് പറയുന്ന റിപ്പോര്‍ട്ടാണ് ലഫ്റ്റനന്റ് ഗവര്‍ണര്‍ക്ക് ലഭിച്ചത്. ഈ റിപ്പോര്‍ട്ടിന്റെ അടിസ്ഥാനത്തിലായിരുന്നു നടപടി. 40 പോസ്റ്റുകള്‍ക്ക് മാത്രമാണ് നിയമപ്രകാരം അനുമതിയുണ്ടായിരുന്നതെന്നും അധിക അംഗങ്ങളെ കമ്മീഷന്‍ നിയമിച്ചുവെന്നുമാണ് റിപ്പോര്‍ട്ട്. 

ഒരു വിധ പഠനവും നടത്താതെയാണ് വനിത കമ്മീഷന്‍ അംഗങ്ങളെ നിയമിച്ചതെന്നും ലഫ്റ്റനന്റ് ഗവര്‍ണര്‍ക്ക് സമര്‍പ്പിച്ച റിപ്പോര്‍ട്ടില്‍ പറയുന്നു. നിയമനത്തിന് ഡല്‍ഹി സര്‍ക്കാറിന്റെ മുന്‍കൂര്‍ അനുമതി വാങ്ങിയില്ലെന്നും ഇവര്‍ക്ക് ചുമതലകള്‍ നല്‍കിയില്ലെന്നും റിപ്പോര്‍ട്ടില്‍ ആരോപിക്കുന്നുണ്ട്. ഡല്‍ഹിയില്‍ ലോക്‌സഭാ തെരഞ്ഞെടുപ്പ് നടക്കാനിരിക്കെയാണ് ഇപ്പോഴത്തെ നടപടി.