പേരൂര്‍ക്കട: ജാമ്യത്തിലിറങ്ങി നിരവധി മോഷണങ്ങള്‍ നടത്തിവന്നയാളെ സിറ്റി ഷാഡോ ടീം പിടികൂടി.
കാഞ്ഞിരംപാറ മരുതംകുഴി സ്വദേശി ചെങ്ങന്നൂര്‍ സതീഷ് എന്നുവിളിക്കുന്ന ബിജുരാജ് (47) ആണ് പിടിയിലായത്. ശാസ്തമംഗലം പുല്ലേക്കോണം സെക്കന്‍ഡ് ലെയിനില്‍ ബിനുവിന്റെ വീട്ടില്‍നിന്നു ടാബ്‌ലെറ്റും രണ്ടു മൊബൈലുകളും ഇയാള്‍ കവര്‍ന്നിട്ടുണ്ട്.
ചലച്ചിത്ര നിര്‍മാതാവ് എന്നു പരിചയപ്പെടുത്തി കാര്‍ വാടകയ്ക്ക് വിളിച്ച് എറണാകുളത്തുപോയശേഷം അവിടെവച്ച് ഡ്രൈവറെ വാടകമുറിയില്‍ വിളിച്ചുവരുത്തി ഭക്ഷണത്തില്‍ മയക്കുമരുന്ന് കലര്‍ത്തി നല്‍കി കാറുമായി കടന്ന വിരുതനുമാണ് ഇയാള്‍.
ഈ കേസില്‍ തിരുവനന്തപുരത്തുവച്ച് ഇയാള്‍ അറസ്റ്റിലായിരുന്നു. ജയിലില്‍നിന്ന്
ഇറങ്ങിയശേഷം കട്ടപ്പന സ്റ്റേഷന്‍ അതിര്‍ത്തിയില്‍നിന്നു കാര്‍ തട്ടിയെടുത്ത കേസില്‍ വീണ്ടും പിടിക്കപ്പെട്ടു. തുടര്‍ന്ന് പീരുമേട് ജയിലില്‍നിന്ന് ഇക്കഴിഞ്ഞ 16ന് മോചിതനായിരുന്നു. തുടര്‍ന്നായിരുന്നു മോഷണം നടത്തിയത്.
കണ്‍ട്രോള്‍ റൂം എ.സി വി. സുരേഷ്‌കുമാര്‍, മ്യൂസിയം എസ്.ഐ ശ്രീകാന്ത് എന്നിവരുടെ നേതൃത്വത്തില്‍ സിറ്റി ഷാഡോ ടീം അംഗങ്ങളാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.