കോഴിക്കോട്: പലസ്തീന്‍ ഐക്യദാര്‍ഢ്യറാലിയുടെ വേദിയില്‍ മുക്കം ഉമ്മര്‍ഫൈസി നിസ്‌കരിച്ചതിനെ അധിക്ഷേപിച്ചും അതിന് വേദിയൊരുക്കിക്കൊടുത്തുവെന്ന് പറഞ്ഞ് സംഘാടകരെ പരിഹസിച്ചും വടകരയിലെ യു.ഡി.എഫ് പൊതുയോഗത്തില്‍ ആര്‍.എം.പി നേതാവ് ഹരിഹരന്‍ നടത്തിയ പ്രസ്താവന യു.ഡി.എഫിന്റെ നിലപാടാണോയെന്ന് പ്രതിപക്ഷനേതാവ് വി.ഡി.സതീശന്‍ വ്യക്തമാക്കണമെന്ന് പലസ്തീന്‍ ഐക്യദാര്‍ഢ്യറാലി സംഘാടകസമിതി.

2023 നവംബര്‍ 11നാണ് കോഴിക്കോട് ട്രേഡ്‌സെന്ററില്‍ ഗസയില്‍ ഇസ്‌റാഈല്‍ നടത്തുന്ന കൂട്ടക്കൊലകള്‍ക്കെതിരെയും പലസ്തീന്‍ ജനതയുടെ  ചെറുത്തുനില്‍പിനോട് ഐക്യദാര്‍ഢ്യം പ്രഖ്യാപിച്ച് റാലി നടന്നത്. 

അത്തരമൊരു വേദിയില്‍ ഒരു മതപണ്ഡിതന്‍ നടത്തിയ നിസ്‌കാരം എങ്ങനെയാണ് ആക്ഷേപകരമാവുന്നതെന്ന് പ്രതിപക്ഷനേതാവ് മതനിരപേക്ഷ സമൂഹത്തോട് വിശദീകരിക്കാന്‍ ബാധ്യസ്തനാണെന്ന് ഐക്യദാര്‍ഢ്യറാലി സംഘാടക സമിതി പ്രസ്താവനയിലൂടെ ആവശ്യപ്പെട്ടു. 

കോഴിക്കോട് നടന്ന പാലസ്തീന്‍ ഐക്യദാര്‍ഢ്യറാലിയെ അന്നേദിവസം തന്നെ ഇതുപോലെ വിമര്‍ശിച്ചത് ബി.ജെ.പിയുടെ സംസ്ഥാന അധ്യക്ഷന്‍ കെ.സുരേന്ദ്രനായിരുന്നു. അതേ സ്വരത്തിലും ശൈലിയിലുമാണ് ആര്‍.എം.പി നേതാവ്, പ്രതിപക്ഷനേതാവും മുസ്ലീംലീഗ് ജനറല്‍ സെക്രട്ടറിയും വടകരയിലെ യു.ഡി.എഫ് സ്ഥാനാര്‍ത്ഥിയും ഇരിക്കുന്ന വേദിയില്‍ നിസ്‌കാരത്തെയും ഉമ്മര്‍ഫൈസിയെയും അധിക്ഷേപിക്കുന്ന തരത്തില്‍ പ്രസംഗിച്ചത്. അവരത് തടഞ്ഞില്ലെന്നു മാത്രമല്ല വേദിയില്‍ അതൊക്കെ രസിച്ചിരിക്കുകയായിരുന്നുവെന്നത് അത്യന്തം അപലപനീയമാണെന്ന് പ്രസ്താവന ചൂണ്ടിക്കാട്ടുന്നു. 

വടകരയിലെ യു.ഡി.എഫ് സമ്മേളനത്തില സ്ത്രീവിരുദ്ധവും ന്യൂനപക്ഷവിരുദ്ധവുമായ അധിക്ഷേപവര്‍ഷങ്ങളുടെ വേദിയാക്കിയതിനുള്ള ഉത്തരവാദിത്വത്തില്‍നിന്ന് പ്രതിപക്ഷനേതാവിന് ഒഴിഞ്ഞുനില്‍ക്കാനാവില്ലെന്നും ഐക്യദാര്‍ഢ്യറാലി സംഘാടകസമിതി ചൂണ്ടിക്കാട്ടി. 

സംഭവത്തില്‍ പ്രതികരിച്ച് സിപിഐഎം ജില്ലാ സെക്രട്ടേറിയറ്റും രംഗത്തെത്തി. മുക്കം ഉമ്മര്‍ ഫൈസി നടത്തിയ നിസ്‌കാരത്തെ ആക്ഷേപിക്കുകയും ആര്‍എസ്എസിന് ചേര്‍ന്ന വിധം കളിയാക്കുകയും ചെയ്ത ആര്‍എംപി നേതാവിന്റെ നിലപാടിനെക്കുറിച്ച് വേദിയിലുണ്ടായിരുന്ന പ്രതിപക്ഷ നേതാവ് വി.ഡി സതീശനും മുസ്‌ലിം ലീഗ് ജനറല്‍ സെക്രട്ടറി പി.എം.എ സലാമും നിലപാട് വ്യക്തമാക്കണമെന്ന് ് സിപിഐഎം ജില്ലാ സെക്രട്ടേറിയറ്റും ആവശ്യപ്പെട്ടു.