ചെന്നൈ: പ്രധാനമന്ത്രി നരേന്ദ്ര മോദിയുടെ തമിഴ് ബയോപിക്കില്‍ നായകനാകാനില്ലെന്ന് നടന്‍ സത്യരാജ്. ആശയപരമായി താനൊരു പെരിയാറിസ്റ്റ് ആണെന്നും താന്‍ മോദിയായി അഭിനയിക്കുമെന്ന വാര്‍ത്തകള്‍ അടിസ്ഥാന രഹിതമാണെന്നും അദ്ദേഹം പറഞ്ഞു. 

മോദി  വിരുദ്ധ തരംഗമുള്ള ദ്രാവിഡ മണ്ണില്‍ പ്രതിച്ഛായ വര്‍ധിപ്പിക്കുന്നതിന്റെ ഭാഗമായാണ് തമിഴില്‍ പുതിയ ബയോപിക്ക് നിര്‍മിക്കാനൊരുങ്ങുന്നത്. ചിത്രത്തില്‍ മോദിയായി മുന്‍കാല സൂപ്പര്‍സ്റ്റാറായ സത്യരാജ് അഭിനയിക്കുമെന്ന് വാര്‍ത്തകളില്‍ റിപ്പോര്‍ട്ടുണ്ടായിരുന്നു. പിന്നാലെ വലിയ രീതിയിലുള്ള വിമര്‍ശനമാണ് നടനെതിരെ ഉയര്‍ന്നത്. കോണ്‍ഗ്രസ് എം.പി കാര്‍ത്തി ചിദംബരം ഉള്‍പ്പെടെയുള്ളവര്‍ വിമര്‍ശനവുമായി രംഗത്തെത്തിയതോടെയാണ് വിശദീകരണവുമായി നടന്‍ നേരിട്ട് രംഗത്തെത്തിയിരിക്കുന്നത്.

2007ല്‍ സാമൂഹിക പരിഷ്‌കര്‍ത്താവായ പെരിയാറിന്റെ ജീവചരിത്രം സിനിമയായപ്പോള്‍ നായകനായത് സത്യരാജായിരുന്നു. ചിത്രത്തിന് പ്രേക്ഷകര്‍ക്കിടയില്‍ മികച്ച പ്രതികരണമാണ് ലഭിച്ചത്. അതേസമയം സത്യരാജിന് മോദിയുടെ വേഷം നല്‍കരുതെന്ന ആവശ്യവുമായി ബി.ജെ.പി കേന്ദ്രങ്ങളും രംഗത്തെത്തിയിട്ടുണ്ട്.