ജിദ്ദ: സഊദിയിൽ ബസ് മറിഞ്ഞു പതിനാല് പേർ മരണപ്പെട്ടു. പടിഞ്ഞാറൻ സഊദിയിലെ ഉംലജിനും അല്‍വജിനുമിടയിലാണ് അപകടം. നിയന്ത്രണം വിട്ട് ബസ് മറിഞാണ്‌ അപകടം. ബസ് ഡ്രൈവർ ഉറങ്ങിയതാവാം ബസ് അപകടത്തിന് കാരണമെന്ന പ്രാഥമിക നിഗമനത്തിലാണ് അധികൃതർ. മരിച്ചവരെല്ലാവരും അറബ് വംശജരാണ്.

സഊദി സന്ദർശക വിസ പുതുക്കാന്‍ ജോര്‍ദാനിലേക്ക് പോയ യാത്രക്കാരായിരുന്നു ഇവർ. മരിച്ചവരിൽ ഏറെയും ഈജിപ്ഷ്യൻ പൗരന്മാരാണെന്നാണ് റിപ്പോർട്ടുകൾ. ശനിയാഴ്ച വൈകീട്ടോടെയാണ് യാംബുവിൽ നിന്നും പരിസര പ്രദേശങ്ങളിൽ നിന്നും മറ്റുമുള്ള യാത്രക്കാരെയും കൂട്ടി ബസ് പുറപ്പെട്ടത്. യാംബുവിൽ ജോലി ചെയ്തിരുന്ന നിരവധി ഈജിപ്ഷ്യൻ കുടുംബങ്ങളും കുട്ടികളും വാഹനത്തിലുണ്ടായിരുന്നുവെന്നാണ് അറിയുന്നത്. 

പരിക്ക് പറ്റിയവരെ ഉംലജിലേയും അൽ വജ്ഹിലെയും ആശുപത്രികളിലേക്ക് ഉടൻ മാറ്റിയതായി ബന്ധപ്പെട്ടവർ അറിയിച്ചു. മരിച്ചവരിൽ ഏറെയും വിദ്യാർഥികളും കുട്ടികളുമാണെന്നും പരിക്കേറ്റവരിൽ അധികപേരും ഗുരുതരാവസ്ഥയിലായിരുന്നുവെന്നും അപകട സ്ഥലത്തുണ്ടായിരുന്ന ദൃക്‌സാക്ഷികളെ ഉദ്ധരിച്ച് പ്രാദേശിക പത്രങ്ങൾ റിപ്പോർട്ട് ചെയ്തു.