ന്യൂഡല്‍ഹി: വനിതാ യാത്രികര്‍ നേരിടുന്ന വലിയൊരു പ്രശ്‌നത്തിന് പരിഹാരവുമായി ഇന്‍ഡിഗോ എയര്‍ലൈന്‍സ്. ഇനി മുതല്‍ വനിതകള്‍ക്ക് അവരവരുടെ സീറ്റിന് തൊട്ടടുത്തിരിക്കുന്നത് സ്ത്രീയാണോ പുരുഷനാണോ എന്ന് നേരത്തെയറിയാം. വെബ് ചെക്ക്-ഇന്‍ വേളയില്‍   മറ്റ് സ്ത്രീ യാത്രക്കാര്‍ മുന്‍കൂട്ടി ബുക്ക് ചെയ്ത സീറ്റുകള്‍ ഏതൊക്കെയാണെന്ന് കാണാന്‍ ഇതിലൂടെ സാധിക്കും. 

സ്ത്രീകള്‍ക്ക് കൂടുതല്‍ സൗകര്യപ്രദവും സുരക്ഷിതവുമായ യാത്ര ഒരുക്കുന്നതിനാണ് ഈ സംവിധാനമെന്ന്  ഇന്‍ഡിഗോ വ്യക്തമാക്കി. അടുത്തിടെ വിമാനങ്ങളില്‍ സ്ത്രീകള്‍ നേരിട്ട ചില അനിഷ്ഠ സംഭവങ്ങളെത്തുടര്‍ന്നാണ് പുതിയ മാറ്റമെന്ന് ഇന്‍ഡിഗോ പുറത്തിറക്കിയ പ്രസ്താവനയില്‍ പറയുന്നു.   

2023 ജനുവരിയില്‍ എയര്‍ ഇന്ത്യ വിമാനത്തില്‍ വനിത യാത്രികയുടെ ദേഹത്ത് യാത്രക്കാരന്‍ മൂത്രമൊഴിച്ച സംഭവം റിപ്പോര്‍ട്ട് ചെയ്തിരുന്നു. അതേ വര്‍ഷം ജൂലൈയില്‍ ഡല്‍ഹിയില്‍ നിന്ന് മുംബൈയിലേക്കുള്ള ഇന്‍ഡിഗോ വിമാനത്തില്‍ വെച്ച് പ്രഫസര്‍ വനിത സഹയാത്രികക്കു നേരെ ലൈംഗികാതിക്രമം നടത്തിയിരുന്നു.

കഴിഞ്ഞ സെപ്റ്റംബറിലും മുംബൈയില്‍ നിന്ന് ഗുവാഹത്തിയിലേക്ക് പറന്ന ഇന്‍ഡിഗോ വിമാനത്തിലും യാത്രക്കാരി സഹയാത്രികനില്‍ നിന്ന് ലൈംഗികാതിക്രമം നേരിട്ടു. തുടര്‍ന്നാണ് വനിതകളുടെ യാത്ര കൂടുതല്‍ സുരക്ഷിതമാക്കാന്‍ ഇന്‍ഡിഗോ തയാറായത്.