കാടു വൃത്തിയാക്കുന്നതിനിടെ വൈദ്യുതാഘാതമേറ്റ യുവാവിന് രക്ഷകരായത് എക്സൈസ് ഉദ്യോഗസ്ഥർ. ന്യൂമാഹിയിൽ കഴിഞ്ഞ ദിവസം വീടിനോടു ചേർന്നുള്ള പറമ്പിലെ കാടു വൃത്തിയാക്കുന്നതിനിടെ ആണ് പവിത്രന് വൈദ്യുതിലൈനിൽ നിന്ന് ഷോക്കേൽക്കുന്നത്.

സമീപത്ത് ജോലിയിൽ ഉണ്ടായിരുന്ന എക്സൈസ് ചെക്പോസ്റ്റ് ഉദ്യോഗസ്ഥർ വെളിച്ചം കണ്ട് ഓടിയെത്തി. അപ്പോൾ പവിത്രൻ ഷോക്കേറ്റ് നിൽക്കുന്നതാണ് കണ്ടത്. ഉടൻതന്നെ എക്സൈസ് ഇൻസ്പെക്ടർ വികെ ഷിബു സംയോജിതമായി ഇടപെട്ട് അപകടം ഒഴിവാക്കി. വൈദ്യുതി ബന്ധം പെട്ടെന്നുതന്നെ വേർപ്പെടുത്താൻ കഴിഞ്ഞതിനാൽ യുവാവ് രക്ഷപ്പെട്ടു.

ശേഷം വേണ്ട ശുശ്രൂഷ നൽകി. മാഹി ഗവൺമെന്റ് ആശുപത്രിയിൽ എത്തിക്കുകയും ചെയ്തു. യുവാവ് അപകടനില തരണം ചെയ്തതായാണ് റിപ്പോർട്ട്. അസിസ്റ്റന്റ് എക്സൈസ് ഇൻസ്പെക്ടർ വികെ ഷിബു, പ്രിവന്റീവ് ഓഫീസർ കെ രാജീവൻ, സിവിൽ എക്സൈസ് ഓഫീസർ വി കെ ഫൈസൽ എന്നിവരാണ് എക്‌സൈസ് സംഘത്തിലുണ്ടായിരുന്നത്.