സ്‌കൂട്ടര്‍ മാര്‍ക്കറ്റില്‍ ഇന്ത്യയില്‍ മികച്ച ഓപ്ഷനുകളാണ് ഉപഭോക്താക്കള്‍ക്ക് തെരെഞ്ഞെടുക്കാനായി ലഭ്യമായത്. ഇലക്ട്രിക്ക്, പെട്രോള്‍ വേരിയന്റുകളില്‍ മികച്ച സ്‌കൂട്ടറുകള്‍ ലഭ്യമായ ഇന്ത്യന്‍ മാര്‍ക്കറ്റിലേക്ക് കമ്പനികള്‍ പുതിയ സ്‌കൂട്ടറുകള്‍ വീണ്ടും അവതരിപ്പിക്കുകയാണ്.ഹീറോ മോട്ടോഴ്‌സിന്റെ ഇന്ത്യയിലെ സ്‌കൂട്ടറുകളെല്ലാം മോശമല്ലാത്ത രീതിയില്‍ വിറ്റഴിക്കപ്പെടുന്നുണ്ട്. ഇപ്പോള്‍ എതിരാളികളായ ഹോണ്ടയെ തറപറ്റിക്കാന്‍ ഹീറോ മോട്ടോകോര്‍പ് തങ്ങളുടെ ഡെസ്റ്റിനി 125 മോഡലിനെ കൂടുതല്‍ പരിഷ്‌ക്കാരിയായി വിപണിയിലേക്ക് എത്തിക്കാന്‍ പോവുകയാണ്.

രാജ്യത്തെ ഏറ്റവും വലിയ ഇരുചക്ര വാഹന നിര്‍മാതാക്കളായ ഹീറോ 2018 അവസാനത്തോടെയാണ് ഡെസ്റ്റിനി 125 ഇന്ത്യയില്‍ പുറത്തിറക്കുന്നത്. ഇതിന് ഉപഭോക്താക്കളില്‍ നിന്ന് മികച്ച സ്വീകാര്യത ലഭിച്ചുവെങ്കിലും സമീപകാലത്ത് വില്‍പ്പന ഇടിഞ്ഞു തുടങ്ങിയിരുന്നു. വരാനിരിക്കുന്ന പുത്തന്‍ മോഡല്‍ ഡെസ്റ്റിനിക്ക് ലഭിക്കുന്ന ആദ്യത്തെ പ്രധാന അപ്‌ഡേറ്റായിരിക്കും എന്നതും ശ്രദ്ധേയമാവുന്ന കാര്യമാണ്.
അടുത്തിടെ പുറത്തിറക്കിയ സൂം 110 കോംബാറ്റ് എഡിഷന് ശേഷം ഹീറോ മോട്ടോകോര്‍പ് അവതരിപ്പിക്കുന്ന അടുത്ത വാഹനമായിരിക്കും ഇത്. 

രൂപത്തിന്റെ കാര്യത്തില്‍ അടിമുടി മാറിയാണ് പുതിയ ഹീറോ ഡെസ്റ്റിനി മോഡലിന്റെ വരവ് തന്നെ. സെഗ്മെന്റിലെ പ്രിയങ്കരനായ സുസുക്കി ആക്‌സസിന്റെ വിപണി പിടിക്കുകയാണ് പ്രധാന ഉദ്ദേശം. അതിനായി ഒരു ഫാമിലി മാനിന്റെ ലുക്കിലാണ് വണ്ടി മിനുങ്ങുന്നത്. ഡിസൈനിലും ഫീച്ചറുകളിലും ധാരാളിയായിരിക്കും ഏറ്റവും പുതിയ 125 സിസി സ്‌കൂട്ടര്‍

നിലവില്‍ ചെസ്റ്റ്‌നട്ട് ബ്രോണ്‍സ്, നോബല്‍ റെഡ്, പേള്‍ സില്‍വര്‍ വൈറ്റ്, പാന്തര്‍ ബ്ലാക്ക്, മാറ്റ് ഗ്രേ സില്‍വര്‍, കാന്‍ഡി ബ്ലേസിംഗ് റെഡ്, ലിമിറ്റഡ് എഡിഷന്‍, മാറ്റ് ബ്ലാക്ക് എന്നിങ്ങനെ എട്ട് കളര്‍ ഓപ്ഷനുകളിലാണ് ഡെസ്റ്റിനി 125 വരുന്നത്. അപ്‌ഗ്രേഡഡ് വേര്‍ഷനില്‍ ഇതിലും മികച്ച നിറങ്ങള്‍ ലഭ്യമാകുമെന്നാണ് സൂചന.

124.6 സിസി സിംഗിള്‍സിലിണ്ടര്‍ എയര്‍കൂള്‍ഡ് ഫ്യൂവല്‍ഇഞ്ചക്റ്റഡ് എഞ്ചിന്‍ തന്നെയായിരിക്കും സ്‌കൂട്ടറിന് കരുത്ത് പകരുക.BSVI ഫേസ് 2 മലിനീകരണ മാനദണ്ഡങ്ങള്‍ പാലിക്കുന്ന എഞ്ചിന്‍ 7,000 ആര്‍പിഎമ്മില്‍ 9 bhp കരുത്തും 5,500 ആര്‍പിഎമ്മില്‍ 10.4 Nm ടോര്‍ക്കും ഉത്പാദിപ്പിക്കാന്‍ ശേഷിയുള്ളതായിരിക്കും.