ഇ.വി വാഹനങ്ങള്‍ക്ക് കേന്ദ്രസര്‍ക്കാര്‍ വീണ്ടും സബ്‌സിഡി നല്‍കിത്തുടങ്ങുമെന്ന് റിപ്പോര്‍ട്ട്.ഹൈബ്രിഡ്, ഇലക്ട്രിക് വാഹനങ്ങളുടെ ഫാസ്റ്റര്‍ അഡോപ്ഷന്‍ ആന്‍ഡ് മാനുഫാക്ചറിംഗ് (ഫെയിം) പദ്ധതി സര്‍ക്കാര്‍ വീണ്ടും പുനരാരംഭിക്കാന്‍ സാധ്യതയുണ്ടെന്നും ഇതിനായി 10,000 കോടി രൂപ വകയിരുത്താനാണ് സാധ്യതയെന്നുമാണ് റിപ്പോര്‍ട്ടുകള്‍. 2024 ബജറ്റില്‍ സര്‍ക്കാര്‍ ഫെയിം 3 പദ്ധതി പ്രഖ്യാപിച്ചേക്കുമെന്ന് ഇക്കണോമിക്ക് ടൈംസ് റിപ്പോര്‍ട്ട് ചെയ്യുന്നു.

നേരത്തെ മാര്‍ച്ച് മാസത്തില്‍ ഇ.വി വാഹനങ്ങളുടെ സബ്‌സിഡി സര്‍ക്കാര്‍ നിര്‍ത്തലാക്കിയിരുന്നു. ഇതോടെ വാഹനങ്ങളുടെ വില്‍പ്പനയില്‍ കുറവുണ്ടായതോടെയാണ് സര്‍ക്കാര്‍ സബ്‌സിഡി വീണ്ടും ആരംഭിക്കാന്‍ ശ്രമിക്കുന്നത്.2024 മാര്‍ച്ചില്‍ സര്‍ക്കാരിന്റെ ഫെയിംII ഉം സംസ്ഥാനങ്ങള്‍ നല്‍കുന്ന സബ്‌സിഡിയും നിര്‍ത്തിയതിനാല്‍ ഇലക്ട്രിക് ഇരുചക്രവാഹനങ്ങളുടെ വില ഗണ്യമായി വര്‍ദ്ധിച്ചിരുന്നു. ഇതുമൂലം ഏപ്രിലില്‍ ഇലക്ട്രിക് ഇരുചക്രവാഹനങ്ങളുടെ വില്‍പ്പനയും ഗണ്യമായി കുറഞ്ഞു. 

ഇലക്ട്രിക് വാഹനങ്ങളുടെ വിലക്കയറ്റം നേരിടാന്‍ കമ്പനികള്‍ നിരവധി ലോ റേഞ്ച് മോഡലുകളും പുറത്തിറക്കിയിരുന്നു. കൂടാതെ, നിരവധി സവിശേഷതകളും വെട്ടിക്കുറച്ചു. അതിനാല്‍ വില്‍പ്പനയെ പ്രതികൂലമായി ബാധിച്ചില്ല. കുറഞ്ഞ വിലയുള്ള മോഡലുകള്‍ അവതരിപ്പിച്ചതോടെ കമ്പനികളുടെ വില്‍പ്പനയും മെച്ചപ്പെട്ടു. എന്നാല്‍ ടോപ്പ്‌സ്‌പെക്ക് മോഡലുകളുടെ ആവശ്യകത ഇതോടെ കുറഞ്ഞു.

അതേസമയം സര്‍ക്കാര്‍ സബ്‌സിഡി നിര്‍ത്തലാക്കിയെങ്കിലും, ഇലക്ട്രിക് ഇരുചക്ര വാഹനങ്ങളുടെയും മുച്ചക്ര വാഹനങ്ങളുടെയും വില്‍പ്പന പ്രോത്സാഹിപ്പിക്കുന്നതിനായി 2024 മാര്‍ച്ചില്‍ ഒരു പുതിയ ഇലക്ട്രിക് മൊബിലിറ്റി പ്രൊമോഷന്‍ സ്‌കീം (ഇഎംപിഎസ്) പ്രഖ്യാപിച്ചു. ഇതിനായി 500 കോടി രൂപ അനുവദിച്ചു.