ആലപ്പുഴ: പല രാഷ്ട്രീയ കക്ഷികളും ചിഹ്നം നിലനിര്‍ത്താന്‍ മത്സരിക്കുമ്പോള്‍ ബി.ജെ.പി ലക്ഷദ്വീപില്‍ സ്വന്തം ചിഹ്നമായ താമര ഉപേക്ഷിച്ച് മറ്റൊരു പാര്‍ട്ടിയുടെ ചിഹ്നത്തിനായി പുതിയ തന്ത്രമൊരുക്കുന്നു. യൂനിറ്റ് പോലും ഇല്ലാത്ത ദ്വീപില്‍ എന്‍.സി.പി അജിത് പവാര്‍ പക്ഷത്തിന്റെ പേരില്‍ എന്‍.ഡി.എ സ്ഥാനാര്‍ഥിയെ മത്സരിപ്പിക്കാനാണ് ബി.ജെ.പിയുടെ തീരുമാനം. 

ഇതുവഴി മണ്ഡലത്തിലെ വോട്ടര്‍മാര്‍ക്ക് സുപരിചതമായ ക്ലോക്ക് ചിഹ്നത്തില്‍ ജനവിധി തേടാമെന്നതാണ് ലക്ഷ്യം. ഇതിന്റെ ഭാഗമായി രാഷ്ട്രീയരംഗത്ത് പ്രവര്‍ത്തിച്ചു പരിചയമില്ലാത്ത കടമത്ത് ദ്വീപിലെ മത, ആത്മീയ മേഖലയില്‍ പ്രവര്‍ത്തിക്കുന്ന യൂസുഫ് സഖാഫി ബി.ജെ.പി - എന്‍.സി.പി ( അജിത് പവാര്‍ ) പാര്‍ട്ടിയുടെ സ്ഥാനാര്‍ഥിയായി മത്സരിക്കും.

രാജ്യത്തെ ഏറ്റവും കുറവ് സമ്മതിദായകരുള്ള മണ്ഡലമായ ലക്ഷദ്വീപിലെ പ്രധാന മത്സരം കോണ്‍ഗ്രസും എന്‍.സി.പിയും തമ്മിലാണ്. എന്‍.സി.പി ശരത് പവാര്‍ വിഭാഗം നേതാവും സിറ്റിങ് എം.പിയുമായ പി. മുഹമ്മദ് ഫൈസലും മുന്‍ എം.പിയും ലക്ഷദ്വീപ് ടെറിറ്റോറിയല്‍ കോണ്‍ഗ്രസ് കമ്മിറ്റി പ്രസിഡന്റുമായ അഡ്വ. ഹംദുല്ല സഈദുമാണ് ഏറ്റുമുട്ടുന്നത്്. 2014 ലും 2019 ലും എന്‍.സി.പിയുടെ മുഹമ്മദ് ഫൈസലിനായിരുന്നു വിജയം. 2019 ല്‍ ബി.ജെ.പിക്ക് ആകെ ലഭിച്ചത് 125 വോട്ട് മാത്രമാണ്. 

കേന്ദ്രസര്‍ക്കാരിന്റെയും ലക്ഷദ്വീപ് അഡ്മിനിസ്‌ട്രേറ്ററായ ബി.ജെ.പി നേതാവ് പ്രഫുല്‍ ഖോഡ പട്ടേലിന്റെയും ഭരണത്തിനെതിരേ ദ്വീപ് സമൂഹം ഒറ്റക്കെട്ടായി നിലകൊള്ളുകയാണ്. ഈ സാഹചര്യത്തിലാണ് ബി.ജെ.പി പുതിയ നീക്കം നടത്തുന്നത്. ദ്വീപില്‍ പത്രിക നല്‍കേണ്ട അവസാനദിവസം ഇന്നാണ്.