മലപ്പുറം: വേനലവധിക്ക് ഗൾഫ് രാഷ്ട്രങ്ങളിലെ സ്‌കൂളുകൾ അടച്ചതോടെ നാട്ടിലേക്ക് അവധിയാഘോഷിക്കാൻ എത്തുന്ന പ്രവാസികളെ പിഴിഞ്ഞ് വിമാനകമ്പനികൾ. ടിക്കറ്റ് നിരക്ക് ഇരട്ടിയിലധികം വര്ധിപ്പിച്ചാണ് വിമാന കമ്പനികൾ കൊള്ളയടി നടത്തുന്നത്. കുടുംബവുമായി സ്വമതം നാട്ടിലേക്ക് എത്താൻ പ്രവാസികൾക്ക് ടിക്കറ്റിനായി ചെലവഴിക്കേണ്ടത് ലക്ഷം രൂപയിലേറെയാണ്. യുഎഇ, സഊദി അറേബ്യ, ഖത്തർ, കുവൈത്ത് തുടങ്ങിയ രാജ്യങ്ങളിൽ നിന്നെല്ലാം നാട്ടിൽ എത്താൻ ആഗ്രഹിക്കുന്നവർക്ക് കനത്ത തിരിച്ചടിയാണ് വിമാനകമ്പനികൾ നൽകുന്നത്.

മിക്ക ഗൾഫ് രാജ്യങ്ങളിലും വേനൽ കടുത്തതോടെ സ്കൂളുകൾ വേനലവധിക്കായി രണ്ട് മാസത്തേക്ക് അടച്ചിട്ടുണ്ട്. ഈ സമയത്താണ് കുടുംബവുമായി ഗൾഫ് രാഷ്ട്രങ്ങളിൽ താമസിക്കുന്നവർ തങ്ങളുടെ മാതാപിതാക്കളെയും ബന്ധുക്കളെയും കാണാനും മറ്റു ആവശ്യങ്ങൾക്കും വേണ്ടി എത്തുന്നത്. കുട്ടികൾക്ക് ഇത്രയും ദിവസം അവധി ലഭിക്കുന്ന സമയം മറ്റൊന്ന് ഇല്ലാത്തതിനാൽ മിക്ക പ്രവാസി കുടുംബങ്ങളും ഈ സമയം നാട്ടിലെത്തും. ഇത് മനസിലാക്കിയാണ് വിമാനക്കമ്പനികളുടെ കൊള്ള നടക്കുന്നത്.

സഊദിയിലെ ജിദ്ദയിൽനിന്നും കേരളത്തിലേക്ക് കഴിഞ്ഞ മാസം വരെ ശരാശരി 12,000 രൂപയായിരുന്നു ടിക്കറ്റ് നിരക്ക്. എന്നാൽ, ഈ വേനലവധി സമയത്ത് ഇതേ ടിക്കറ്റിന് 30,000 രൂപയിലേറെ നൽകണം. ഒരു നാലംഗ കുടുംബത്തിന് ഈ നിരക്കിൽ യാത്രചെയ്യാൻ ഒന്നേകാൽ ലക്ഷത്തിലേറെ രൂപയെങ്കിലും ചെലവ് വരും. തിരിച്ച് പോകാനും ഇതേ കൊള്ള നിരക്ക് നൽകണം. അതോടെ നാട്ടിൽ വന്ന് പോകാൻ വിമാന യാത്ര ചെലവ് മാത്രം മൂന്ന് ലക്ഷത്തോളം രൂപയാകും.

സഊദിയ്ക്ക് പുറമെ അബൂദബി, ദുബൈ, ഷാർജ, ദോഹ, കുവൈത്ത് സിറ്റി തുടങ്ങി ഗൾഫിൽ നിന്നുള്ള മിക്ക നഗരങ്ങളിൽ നിന്നും നേരത്തയുള്ളതിനെക്കാൾ ഇരട്ടിയോ അതിലേറെയോ പണം നൽകിയാലെ കേരളത്തിൽ എത്താൻ കഴിയൂ എന്നതാണ് അവസ്ഥ. വേനലവധി അവസാനിച്ച് തിരിച്ച് ഇതേ നഗരങ്ങളിലേക്ക് പോകാനും ഇതുപോലെ കൊള്ളപ്പണം നൽകണം. ഓഗസ്റ്റ് അവസാനം മുതൽ പ്രവാസികളുടെ തിരിച്ച് പോകൽ തുടങ്ങുന്നതിനാൽ ഉയർന്ന ഫ്ലൈറ്റ് ടിക്കറ്റ് വേണം നൽകാൻ.

അതേസമയം, ഭീമമായ യാത്ര ചെലവ് കാരണം നാട്ടിലേക്ക് വരാൻ സാധിക്കാത്ത കുടുംബങ്ങളും ഗൾഫ് രാഷ്ട്രങ്ങളിൽ ഉണ്ട്. ഈ കൊടും ചൂടിൽ കുട്ടികളുമായി കഴിയുകയാണ് അവർ. അതേസമയം പ്രവാസികളെ കൊള്ളയടിക്കുന്ന ഇത്തരം വിമാന കമ്പനികളെ നിയന്ത്രിക്കണമെന്ന ആവശ്യം പ്രവാസി സംഘടനകൾ മുന്നോട്ട് വെക്കുന്നുണ്ടെങ്കിലും ഈ വിഷയത്തിൽ സർക്കാർ ഇടപെടൽ ഇതുവരെ ഉണ്ടായിട്ടില്ല.