കോട്ടയം: കേരളാ കോണ്‍ഗ്രസ് (എം)ന്റെ ഇടതുമുന്നണി പ്രവേശനത്തിനെ എതിര്‍ത്ത സി.പി.ഐയെ കണക്കിന് വിമര്‍ശിച്ചും പരിഹസിച്ചും പാര്‍ട്ടി മുഖവാരിക 'പ്രതിച്ഛായ' രംഗത്ത്. ഇടതുമുന്നണി പ്രവേശനത്തിനായി പാര്‍ട്ടി ആര്‍ക്കും അപേക്ഷ കൊടുത്തിട്ടില്ലെന്നും അതുകൊണ്ട് സി.പി.ഐ വിളറി പിടിക്കേണ്ടെന്നും പാര്‍ട്ടി മുഖവാരികയിലെ ലേഖനത്തില്‍ പറയുന്നു. എന്നാല്‍ കേരളാ കോണ്‍ഗ്രസ് (എം) എല്‍.ഡി.എഫിലേക്ക് ചേക്കേറുമെന്ന സി.പി.ഐയുടെ ആശങ്കക്ക് കഴമ്പുണ്ടെന്നും മുന്നണിയിലെ തങ്ങളുടെ രണ്ടാംസ്ഥാനം നഷ്ടമാകുമോയെന്നാണ് അവരുടെ ഭയമെന്നും ലേഖനം പരിഹസിക്കുന്നു.

കേരളാ കോണ്‍ഗ്രസിനെ ആക്രമിക്കുക വഴി യു.ഡി.എഫിനെ ശക്തിപ്പെടുത്താനുള്ള നീക്കമാണോ സി.പി.ഐ നടത്തുന്നതെന്നു സംശയിക്കണം. യു.ഡി.എഫ് ദുര്‍ബലമായാല്‍ സംഘ്പരിവാര്‍ ശക്തമാകുമെന്നാണ് സി.പി.ഐയുടെ പുതിയ കണ്ടുപിടുത്തം. അതുകൊണ്ട് യു.ഡി.എഫിനെ ദുര്‍ബലമാക്കുന്ന കേരളാ കോണ്‍ഗ്രസ് നിലപാടിനെ പ്രോല്‍സാഹിപ്പിക്കരുതെന്നുമുള്ള സി.പി.ഐയുടെ നിലപാട് ഗൂഢലാക്കോടെയുള്ളതാണ്.
യു.ഡി.എഫിനെ ശക്തിപ്പെടുത്താന്‍ അവസരം കിട്ടിയാല്‍ അത് നഷ്ടപ്പെടുത്തരുതെന്നും ലേഖനം ഉപദേശിക്കുന്നു. സി.പി.എമ്മുമായി അഭിപ്രായ വ്യത്യാസത്തിന്റെ പേരില്‍ കൂടുമാറി യു.ഡി.എഫിലെത്താനുള്ള സാധ്യത സി.പി.ഐയുടെ പാരമ്പര്യം വച്ച് തള്ളിക്കളയാനാവില്ല. കേരള രാഷ്ട്രീയത്തില്‍ സ്വന്തം കാലില്‍ നില്‍ക്കാനുള്ള ശേഷി കേരളാ കോണ്‍ഗ്രസിനുണ്ട്. പിറന്നുവീണ് ആറുമാസത്തിനുള്ളില്‍ 25 നിയമസഭാ സീറ്റുകള്‍ നേടി 1965ല്‍ കരുത്ത് തെളിയിച്ചതാണ്. ആ തെരഞ്ഞെടുപ്പില്‍ അമ്പേ പരാജയപ്പെട്ട സി.പി.ഐ പിന്നീടൊരിക്കലും ഒറ്റക്ക് നില്‍ക്കാനുള്ള സാഹസം കാണിച്ചിട്ടില്ല. 1967ല്‍ രാഷ്ട്രീയ രക്ഷകനായ സി.പി.എമ്മിനോട് സി.പി.ഐ നന്ദികേട് കാണിച്ചു. ഇ.എം.എസിനെ മുഖ്യമന്ത്രിപദം രാജിവയ്ക്കാന്‍ നിര്‍ബന്ധിതനാക്കി.

പിന്നീട് അച്യുതമേനോന്റെ നേതൃത്വത്തില്‍ മന്ത്രിസഭ രൂപീകരിക്കാന്‍ കോണ്‍ഗ്രസിനേയും കേരളാ കോണ്‍ഗ്രസിനേയും കൂട്ടുപിടിച്ചു. അന്നത്തെ വഞ്ചനക്ക് 1979ല്‍ പി.കെ.വി മുഖ്യമന്ത്രിപദം രാജിവച്ചതോടെ പ്രായശ്ഛിത്തം ചെയ്തു. ഇന്ദ്രജിത് ഗുപ്ത, എ.ബി ബര്‍ദന്‍, പി.കെ.വി, വെളിയം ഭാര്‍ഗവന്‍ തുടങ്ങിയ നേതാക്കളുടെ ത്യാഗോജ്വല പ്രവര്‍ത്തനമാണ് സി.പി.ഐക്ക് അല്‍പമെങ്കിലും മാന്യത നേടിക്കൊടുത്തത്. ആ പൈതൃകത്തെ പിന്തുടരാന്‍ പില്‍ക്കാലത്ത് കഴിഞ്ഞോയെന്ന് ആത്മപരിശോധന നടത്തണം. അടി ഇരിക്കുന്നിടത്ത് ചെകിട് വച്ചു കൊടുക്കരുതെന്ന ഉപദേശത്തോടെയാണ് ലേഖനം അവസാനിക്കുന്നത്.