തിരുവനന്തപുരം: തിരുവനന്തപുരത്തെ ആമയിഴഞ്ചന്‍ തോട്ടില്‍ കാണാതായ തൊഴിലാളിയ്ക്കായുള്ള തെരച്ചില്‍ പുരോഗമിക്കുന്നു. കാണാതായിട്ട് എട്ടാം മണിക്കൂറിലേക്ക് കടക്കുമ്പോള്‍ സ്‌കൂബ സംഘത്തിന് ടണലിനുള്ളിലേക്ക് കടക്കാന്‍ കഴിയാത്തതാണ് രക്ഷാ പ്രവര്‍ത്തനത്തിന് വെല്ലുവിളിയാവുന്നത്. ടണലില്‍ 30 മീറ്റര്‍ അകത്തേക്കു പോയെന്നും ടണലില്‍ മൊത്തം ഇരുട്ടാണെന്നും ആമയിഴഞ്ചന്‍ തോട്ടില്‍ കാണാതായ തൊഴിലാളിയ്ക്കായി തെരച്ചില്‍ നടത്തുന്ന സ്‌കൂബസംഘം പറഞ്ഞു. 

ടണലിനുള്ളില്‍ മൊത്തം ഇരുട്ടാണ്. ഇനി ടണലിന്റെ മറുവശത്ത് നിന്ന് കയറാന്‍ നോക്കുകയാണ്. രാത്രിയായാല്‍ തെരച്ചില്‍ നിര്‍ത്തി വെക്കേണ്ടി വരുമെന്നും രാത്രിയായാല്‍ സ്‌കൂബ ഡൈവേഴ്‌സ് പരിശോധന ബുദ്ധിമുട്ടാണെന്നും ഫയര്‍ ഓഫീസര്‍ പറഞ്ഞിരുന്നു. 

അതേസമയം, മറുവശത്തെ ടണലിലെ പരിശോധനയും വിഫലമായി. 15 മീറ്റര്‍ മാത്രമാണ് അകത്തേക്ക് കയറാനായത്. മുഴുവന്‍ ചെളി മൂടി കിടക്കുകയാണ്. മറുവശത്ത് ഇനി തെരച്ചില്‍ നടത്തേണ്ട കാര്യമില്ലെന്നും സ്‌കൂബ സംഘം പറഞ്ഞു. അപകടം നടന്ന ഭാഗത്തെ ടണലില്‍ കൂടുതല്‍ പരിശോധന നടത്തും. അവിടെ 30 മീറ്റര്‍ വരെ സ്‌കൂബ ഡൈവേഴ്‌സ് പോയിരുന്നു. രാത്രിയിലെ പരിശോധന സാഹചര്യം  അനുസരിച്ചായിരിക്കുമെന്നും സംഘം കൂട്ടിച്ചേര്‍ത്തു. 

 റെയില്‍വേ സ്റ്റേഷന് സമീപത്തെ തോട് വൃത്തിയാക്കാനിറങ്ങിയയാളെ രാവിലെ 11.30 ഓടെയാണ് കാണാതായത്.