തിരുവനന്തപുരം: റെയില്‍വേ സ്‌റ്റേഷന് സമീപം ആമയിഴഞ്ചാന്‍ തോട്ടില്‍ കാണാതായ തൊഴിലാളിക്ക് വേണ്ടിയുള്ള തെരച്ചിലിന് റോബോട്ടിക് സംവിധാനം ഏര്‍പ്പെടുത്തി. മാന്‍ഹോളിലേക്ക് ഇറങ്ങാന്‍ ശേഷിയുള്ള റോബോട്ടിനെയാണ് എത്തിച്ചത്. സ്റ്റാര്‍ട്ട് അപ്പ് മിഷന്റെ ഭാഗമായി ആരംഭിച്ച ജന്‍ റോബോട്ടിക്‌സ് കമ്പനിയുടെ റോബോട്ടിക് യന്ത്രമാണ് എത്തിച്ചിരിക്കുന്നത്. ജന്‍ റോബോട്ടിക്‌സിന്റെ യന്ത്രം മൂന്നാമത്തെ പ്ലാറ്റ്‌ഫോമില്‍ എത്തിച്ചിട്ടുണ്ട്. ഇനിയുള്ള രക്ഷാപ്രവര്‍ത്തനം റോബോട്ടിനെ ഉപയോഗിച്ചാണ് നടത്തുക.

നേരത്തെ വെളിച്ചം നഷ്ടപ്പെട്ടത് മൂലം സ്‌കൂബ സംഘത്തിന്റെ തിരച്ചില്‍ അവസാനിപ്പിച്ചിരുന്നു. ജോയിയെ കണ്ടെത്താന്‍ പലതവണ സ്‌കൂബ സംഘം തോട്ടിലിറങ്ങിയെങ്കിലും ദുഷ്‌കരമായതിനാല്‍ തിരിച്ച് കയറുകയായിരുന്നു. ടണലിനടിയിലെ മാലിന്യം നീക്കം ചെയ്യാതെ തിരച്ചില്‍ സാധ്യമാകില്ലെന്നാണ് രക്ഷാസംഘത്തിന്റെ അറിയിപ്പ്. 

റെയില്‍വേ സ്റ്റേഷന് സമീപം തോട് വൃത്തിയാക്കാനിറങ്ങിയ മാരായമുട്ടം സ്വദേശി ജോയിയെയാണ് രാവിലെയോടെ കാണാതായത്. റെയില്‍വേയുടെ നിര്‍ദേശമനുസരിച്ചാണ് ജോയ് തോട് വൃത്തിയാക്കാന്‍ ഇറങ്ങിയത്. വലകെട്ടി മാലിന്യം മാറ്റാനുള്ള ശ്രമത്തിനിടെ ഇയാള്‍ തോട്ടിലെ ഒഴുക്കില്‍പ്പെട്ടെന്നാണ് കരുതുന്നത്.