ന്യൂഡല്‍ഹി: അനധികൃത സ്വത്ത് സമ്പാദന കേസില്‍ കര്‍ണാടക ഉപമുഖ്യമന്ത്രിയും കോണ്‍ഗ്രസ് നേതാവുമായ ഡി.കെ ശിവകുമാര്‍ നല്‍കിയ ഹരജി സുപ്രിം കോടതി തള്ളി. സി.ബി.ഐയുടെ എഫ്.ഐ.ആര്‍ ചോദ്യം ചെയ്താണ് ഡി.കെ. ശിവകുമാര്‍ സുപ്രിം കോടതിയെ സമീപിച്ചിരുന്നത്. കര്‍ണാടക ഹൈകോടതിയുടെ തീരുമാനത്തില്‍ ഇടപെടുന്നില്ലെന്ന് ചൂണ്ടിക്കാട്ടിയാണ് സുപ്രിം കോടതി ഹരജി തള്ളിയത്.

മന്ത്രിയായിരിക്കെ 2013 -2018 കാലയളവില്‍ ഡി.കെ ശിവകുമാര്‍ അനധികൃത സ്വത്ത് സമ്പാദിച്ചെന്നാണ് സി.ബി.ഐയുടെ എഫ്.ഐ.ആറില്‍ പറയുന്നത്. ഈ എഫ്.ഐ.ആറിനെ ചോദ്യം ചെയ്ത് കര്‍ണാടക ഹൈക്കോടതിയില്‍ ഹരജി നല്‍കിയിരുന്നെങ്കിലും തള്ളിയിരുന്നു. മാത്രമല്ല, അന്വേഷണം മൂന്നു മാസത്തിനകം അവസാനിപ്പിക്കണമെന്ന് നിര്‍ദേശവും നല്‍കിയിരുന്നു.

തുടര്‍ന്നാണ് അദ്ദേഹം സുപ്രിം കോടതിയിലെത്തിയത്. ജസ്റ്റിസുമാരായ ബേല എം. ത്രിവേദിയും എസ്.സി ശര്‍മയുമാണ് ഹരജി പരിഗണിച്ചത്. എല്ലാ കുംഭകോണങ്ങളും സൃഷ്ടിച്ചത് ബി.ജെ.പിയാണെന്ന് ശിവകുമാര്‍ കുറ്റപ്പെടുത്തി. അതിനാലാണ് അവരെ ആളുകള്‍ പുറത്താക്കിയത്. ഇപ്പോള്‍, ഞങ്ങള്‍ എല്ലാം വൃത്തിയാക്കാന്‍ ശ്രമിക്കുകയാണ്. അവരുടെ പേരുകള്‍ പുറത്തുവരുമെന്നതിനാല്‍ അവര്‍ക്ക് ഇത് ദഹിക്കാന്‍ കഴിയുന്നില്ല അദ്ദേഹം പ്രതികരിച്ചു.