ഭോപാല്‍: ബിരുദ പഠനം കൊണ്ട് കാര്യമില്ലെന്നും ജീവിക്കാനായി പഞ്ചര്‍ കട തുടങ്ങണമെന്നും വിദ്യാര്‍ഥികളെ ഉപദേശിച്ച് ബി.ജെ.പി എം.എല്‍.എ. മധ്യപ്രദേശിലെ ഗുണ എം.എല്‍.എ പന്നാലാല്‍ ശാക്യയുടേതാണ് ഈ 
'വിദഗ്‌ധോപദേശം'. ഗുണയിലെ പ്രൈം മിനിസ്റ്റേര്‍സ് കോളജ് ഓഫ് എക്‌സലന്‍സ് ഉദ്ഘാടനം ചെയ്തുകൊണ്ടാണ് എം.എല്‍.എ ഉപദേശം നടത്തിയത് എന്നതാണ് ശ്രദ്ധേയം.

'നമ്മള്‍ പ്രൈം മിനിസ്റ്റേര്‍സ് കോളജ് ഓഫ് എക്‌സലന്‍സ് ആരംഭിക്കുകയാണ്. എന്നാല്‍ ഒരു കാര്യം മനസ്സില്‍ സൂക്ഷിക്കാന്‍ ഞാന്‍ നിങ്ങളോട് അപേക്ഷിക്കുകയാണ്. ഡിഗ്രി പഠനം കൊണ്ടൊന്നും പ്രത്യേകിച്ച് ഒരു കാര്യവുമില്ല. പകരം പഞ്ചര്‍ കട തുടങ്ങുക. ചുരുങ്ങിയത് ജീവിക്കാനുള്ളതെങ്കിലും കിട്ടും' ശാക്യ പറഞ്ഞു. 

ശാക്യയുടെ പരാമര്‍ശം സമൂഹമാധ്യമങ്ങളില്‍ പ്രചരിച്ചതോടെ വലിയ വിമര്‍ശനമാണ് ബി.ജെ.പി നേരിടേണ്ടി വന്നത്.