ന്യൂഡല്‍ഹി: പാര്‍ലമെന്റിലെ ചക്രവ്യൂഹ് പ്രസംഗത്തിന് പിന്നാലെ തനിക്കെതിരെ ഇഡി റെയ്ഡിന് പദ്ധതിയിടുന്നെന്ന് പ്രതിപക്ഷ നേതാവ് രാഹുല്‍ ഗാന്ധി. തന്റെ ചക്രവ്യൂഹ് പ്രസംഗം രണ്ടില്‍ ഒരാള്‍ക്ക് ഇഷ്ട്ടമായില്ലെന്ന് വ്യക്തമായെന്നും രാഹുല്‍ ഗാന്ധി പറഞ്ഞു. ഇഡിയുടെ അകത്തുള്ളവരാണ് റെയ്ഡിന് തയ്യാറെടുക്കുന്ന വിവരം അറിയിച്ചതെന്നും രാഹുല്‍ എക്സില്‍ കുറിച്ചു.

ഇ.ഡിയുടെ വരവിനായി ചായയും ബിസ്‌ക്കറ്റുമായി കാത്തിരിക്കുകയാണ് താനെന്നും രാഹുല്‍ പരിഹസിച്ചു. ഇഡിയെ ടാഗ് ചെയ്തുകൊണ്ടായിരുന്നു രാഹുലിന്റെ പോസ്റ്റ്.

പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള എന്‍.ഡി.എ സര്‍ക്കാര്‍ 2024 ലെ ബജറ്റ് പ്രഖ്യാപനങ്ങളിലൂടെ മധ്യവര്‍ഗത്തെ മുന്നില്‍നിന്നും പിന്നില്‍നിന്നും കുത്തുകയാണ് ചെയ്തതെന്ന് രാഹുല്‍ ജൂലൈ 29 ന് ലോക്സഭയില്‍ പറഞ്ഞിരുന്നു. ഭരണപക്ഷത്തെയും ആര്‍എസ്എസിനെയും അംബാനി, അദാനി ഉള്‍പ്പെടെയുള്ള വ്യവസായികളെയും കടന്നാക്രമിച്ചുകൊണ്ടായിരുന്നു രാഹുലിന്റെ പ്രസംഗം. ചെറുകിട ഇടത്തരം ബിസിനസുകാരും ഇവര്‍ തീര്‍ത്ത ആധുനിക ചക്രവ്യൂഹത്തില്‍ പെട്ടുകിടക്കുകയാണ് എന്നായിരുന്നു രാഹുല്‍ ആരോപിച്ചത്.

അന്ന് രാഹുലിന്റെ ചക്രവ്യൂഹ പരാമര്‍ശത്തില്‍ സ്പീക്കര്‍ ഓം ബിര്‍ള ഇടപെടുകയും ചെയ്തിരുന്നു. 'ഇന്ത്യ പിടിച്ചടക്കിയ ചക്രവ്യൂഹത്തിന് പിന്നില്‍ മൂന്ന് ശക്തികളുണ്ട്. ഇതില്‍ ആദ്യത്തേത് കുത്തക മൂലധനമാണ്, ഇന്ത്യന്‍ സമ്പത്ത് മുഴുവന്‍ കൈവശമാക്കാന്‍ രണ്ട് പേരെ അനുവദിക്കുന്നു. ഈ രാജ്യത്തെ സ്ഥാപനങ്ങള്‍, ഏജന്‍സികള്‍, സിബിഐ, ഇഡി, ആദായ നികുതി വകുപ്പ് ഇവര്‍ ഇതിനുള്ളില്‍ പ്രവര്‍ത്തിക്കുന്നു. എല്ലാവരും ചേര്‍ന്ന് രാജ്യത്തെ തകര്‍ത്തുവെന്നും രാഹുല്‍ ഗാന്ധി ആരോപിച്ചിരുന്നു.