ദുബൈ: സര്‍വ മേഖലകളില്‍ മികവ് പുലര്‍ത്താനും മനുഷ്യ രാശിക്ക് മികച്ച ഭാവി സൃഷ്ടിക്കുന്നതില്‍ പ്രധാന പങ്കാളിയെന്ന നിലയില്‍ അതിന്റെ പങ്ക് വര്‍ധിപ്പിക്കാനുമുള്ള യു.എ.ഇയുടെ പ്രതിബദ്ധത ഊന്നിപ്പറഞ്ഞ് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം. സുസ്ഥിരത, നവീകരണം, നൂതന അടിസ്ഥാന സൗകര്യങ്ങള്‍ എന്നിവയില്‍ ആഗോള പങ്കാളിത്തം ശക്തിപ്പെടുത്താന്‍ രാജ്യം പ്രതിജ്ഞാബദ്ധമാണെന്നും മജ്‌ലിസില്‍ അദ്ദേഹം വ്യക്തമാക്കി. 

യു.എ.ഇയുടെ വികസന യാത്ര സുപ്രധാന മേഖലകളില്‍ മുഖ്യ നേട്ടങ്ങള്‍ കൈവരിച്ചിട്ടുണ്ടെന്നും സാമ്പത്തിക വികസനത്തില്‍ സ്വകാര്യ മേഖല പ്രധാന പങ്ക് വഹിക്കുന്നുണ്ടെന്നും ശൈഖ് മുഹമ്മദ് കൂട്ടിച്ചേര്‍ത്തു. വരുമാന സ്രോതസുകള്‍ വൈവിധ്യവല്‍ക്കരിക്കാനും നിക്ഷേപാവസരങ്ങള്‍ വര്‍ധിപ്പിക്കാനും പുതിയ ബിസിനസ് അവസരങ്ങള്‍ സൃഷ്ടിക്കാനുമുള്ള യു.എ.ഇയുടെ തന്ത്രവുമായി ഇത് യോജിക്കുന്നു. 

ഒരു ആഗോള വ്യാപാര കേന്ദ്രം, സര്‍ഗാത്മകഡിജിറ്റല്‍ സമ്പദ്‌വ്യവസ്ഥാ കേന്ദ്രവും, ബഹുരാഷ്ട്ര കമ്പനികളുടെ പ്രധാന അടിത്തറ എന്ന നിലയില്‍ ദുബൈ അതിന്റെ സ്ഥാനം മെച്ചപ്പെടുത്തുന്നു. വിനോദ സഞ്ചാരം, ബിസിനസ്, നിക്ഷേപം എന്നിവയ്ക്കായുള്ള മികച്ച ലക്ഷ്യസ്ഥാനമായി ദുബൈയെ സ്ഥാപിക്കാനാണ് ശൈഖ് മുഹമ്മദ് ലക്ഷ്യമിടുന്നത്. ദുബൈയെ ലോകത്തിലെ ഏറ്റവും മികച്ച മൂന്ന് നഗര സമ്പദ് വ്യവസ്ഥകളിലൊന്നാക്കി മാറ്റാനും അതിന്റെ സാമ്പത്തിക, വ്യാപാര മത്സര ക്ഷമത വര്‍ധിപ്പിക്കാനുമുള്ള ദുബൈ എകണോമിക് അജണ്ടയുടെ ലക്ഷ്യവുമായി ഈ തന്ത്രം യോജിക്കുന്നു. 

ശക്തമായ പങ്കാളിത്തം, പൊതുസ്വകാര്യ മേഖലകള്‍ തമ്മിലുള്ള സമന്വയം, ലോകമെമ്പാടുമുള്ള തന്ത്രപ്രധാന പങ്കാളികളുമായുള്ള കരുത്തുറ്റ ബന്ധങ്ങള്‍ എന്നിവയാണ് ദുബൈയുടെ എല്ലാ മേഖലകളിലെയും അസാധാരണമായ പ്രകടനത്തിന് കാരണം. 
ദുബൈയുടെ ഭാവിയെ നയിക്കുന്നതില്‍ നവീകരണത്തിന്റെയും നൂതന സാങ്കേതിക വിദ്യയുടെയും പ്രാധാന്യത്തെ ശൈഖ് മുഹമ്മദ് ബിന്‍ റാഷിദ് എടുത്തു പറഞ്ഞു. ആധുനിക നിയമങ്ങളും ചട്ടങ്ങളും പിന്തുണയ്ക്കുന്ന ഈ മേഖലകളിലെ സ്റ്റാര്‍ട്ടപ്പുകള്‍ക്ക് അനുയോജ്യമായ അന്തരീക്ഷത്തിന്റെ ആവശ്യകതയും അദ്ദേഹം ചൂണ്ടിക്കാട്ടി. 

ദുബൈ സിവില്‍ ഏവിയേഷന്‍ അതോറിറ്റി ചെയര്‍മാനും ദുബൈ എയര്‍പോര്‍ട്‌സ് ചെയര്‍മാനും എമിറേറ്റ്‌സ് എയര്‍ലൈന്‍ ആന്‍ഡ് ഗ്രൂപ് സി.ഇ.ഒയുമായ ശൈഖ് അഹ്മദ് ബിന്‍ സഈദ് അല്‍ മക്തൂം, ദുബൈ മീഡിയ ഇന്‍കോര്‍പറേറ്റഡ് ചെയര്‍മാന്‍ ശൈഖ് ഹാഷര്‍ ബിന്‍ മക്തൂം ബിന്‍ ജുമാ അല്‍ മക്തൂം എന്നിവരും, നിരവധി ശൈഖുമാരും മന്ത്രിമാരും മുതിര്‍ന്ന ഉദ്യോഗസ്ഥരും പങ്കെടുത്തു. 

യു.എ.ഇയുടെ ഡിജിറ്റല്‍ പരിവര്‍ത്തനം, നേട്ടങ്ങള്‍, ദേശീയ സുരക്ഷ എന്നിവ സംരക്ഷിക്കുന്നതില്‍ സൈബര്‍ സുരക്ഷയുടെ പ്രാധാന്യത്തെ കുറിച്ച് യു.എ.ഇ സൈബര്‍ സുരക്ഷാ കൗണ്‍സില്‍ ചെയര്‍മാന്‍ മുഹമ്മദ് ഹമദ് അല്‍കുവൈത്തിയുടെ പ്രഭാഷണവും യോഗത്തില്‍ അവതരിപ്പിച്ചു.