റിയാദ്: യു.എസ് ചാരസംഘടനയായ സി.ഐ.എയുടെ സഊദി അറേബ്യയിലെ ആസ്ഥാനത്തിനു നേര്‍ക്ക് ഇറാന്റെ ഡ്രോണ്‍ ആക്രമണം. സഊദി തലസ്ഥാനമായ റിയാദിലെ അമേരിക്കന്‍ എംബസി വളപ്പിനുള്ളിലെ സിഐഎ സ്റ്റേഷന്‍ ലക്ഷ്യമിട്ടാണ് ആക്രമണം നടന്നതെന്ന് വാഷിങ്ടണ്‍ പോസ്റ്റ് റിപ്പോര്‍ട്ട്‌ചെയ്തു. ഇന്നലെ പുലര്‍ച്ചെ എംബസിക്ക് നേര്‍ക്ക് നടന്ന ആക്രമണത്തിനൊപ്പമാണ് അതിന്റെ കോംപൗണ്ടിനുള്ളിലെ സി.ഐ.എ കേന്ദ്രവും ആക്രമിക്കപ്പെട്ടതെന്നാണ് റിപ്പോര്‍ട്ട്. 
റിയാദിലെ നയതന്ത്ര മേഖലയില്‍ സ്ഥിതി ചെയ്യുന്ന യു.എസ് കേന്ദ്രത്തിനു നേരെ രണ്ട് ഡ്രോണുകളാണ് പതിച്ചത്. ആക്രമണത്തില്‍ കോമ്പൗണ്ടില്‍ തീപിടുത്തമുണ്ടാവുകയും നാശനഷ്ടങ്ങള്‍ സംഭവിക്കുകയും ചെയ്തു. ആക്രമണ സമയത്ത് കെട്ടിടം ഒഴിഞ്ഞുകിടക്കുകയായിരുന്നതിനാല്‍ ആളപായം ഉണ്ടായില്ലെന്നാണ് റിപ്പോര്‍ട്ട്. ആകെ ആറു ഡ്രോണുകളാണ് വന്നത്. അതില്‍ നാല് ഡ്രോണുകളെ പ്രതിരോധ സംവിധാനങ്ങള്‍ തകര്‍ത്തു.
എംബസി ആക്രമണത്തോടും അമേരിക്കന്‍ സൈനികര്‍ കൊല്ലപ്പെട്ട സംഭവത്തോടും ഉടന്‍ പ്രതികരിക്കുമെന്ന് പ്രസിഡന്റ് ഡൊണാള്‍ഡ് ട്രംപ് ഭീഷണിമുഴക്കി. ഞങ്ങളുടെ മറുപടി എന്താണെന്ന് നിങ്ങള്‍ ഉടന്‍ അറിയും- ട്രംപ് പറഞ്ഞു.

ആക്രമണത്തിന് പിന്നാലെ ഈജിപ്ത് മുതല്‍ കിഴക്കോട്ടുള്ള എല്ലാ പശ്ചിമേഷ്യന്‍ രാജ്യങ്ങളില്‍ നിന്നും എത്രയും വേഗം ഒഴിഞ്ഞുപോകാണമെന്ന് അമേരിക്കന്‍ പൗരന്മാര്‍ക്ക് വാഷിങ്ടണ്‍ നിര്‍ദ്ദേശം നല്‍കി. 

ഗള്‍ഫ് രാജ്യങ്ങളിലെ അമേരിക്കന്‍ നയതന്ത്ര കേന്ദ്രങ്ങളെ ലക്ഷ്യമിട്ടുള്ള ആക്രമണങ്ങള്‍ ഇറാന്‍ ശക്തമാക്കിയിട്ടുണ്ട്. ചൊവ്വാഴ്ച രാത്രി ദുബൈയിലെ യു.എസ് കോണ്‍സുലേറ്റിന് സമീപവും ഡ്രോണ്‍ ആക്രമണത്തെത്തുടര്‍ന്ന് തീപിടുത്തമുണ്ടായി. എന്നാല്‍ തീ ഉടന്‍ തന്നെ നിയന്ത്രണവിധേയമാക്കിയതായി ദുബൈ മീഡിയ ഓഫീസ് അറിയിച്ചു.

അതേസമയം, ഇറാന്റെ പ്രത്യാക്രമണ ശേഷി കുറഞ്ഞുവരികയാണെന്ന് യുഎസ് സെന്‍ട്രല്‍ കമാന്‍ഡ് ചീഫ് അഡ്മിറല്‍ ബ്രാഡ് കൂപ്പര്‍ അവകാശപ്പെട്ടു. ഇതുവരെ 500ലധികം ബാലിസ്റ്റിക് മിസൈലുകളും 2,000ത്തിലധികം ഡ്രോണുകളും ഇറാന്‍ പ്രയോഗിച്ചിട്ടുണ്ടെങ്കിലും, അമേരിക്കയുടെ ശക്തമായ തിരിച്ചടിയില്‍ ഇറാന്റെ മിസൈല്‍ ലോഞ്ചറുകള്‍ തകര്‍ക്കപ്പെട്ടത് അവരുടെ ശേഷിയെ ബാധിച്ചിട്ടുണ്ടെന്ന് അദ്ദേഹം പറഞ്ഞു.

ALSO READ: ഖത്തറില്‍ ഇറാന്റെ റെവല്യൂഷണറി ഗാര്‍ഡുമായി ബന്ധമുള്ള സംഘം പിടിയില്‍; സൈനിക കേന്ദ്രങ്ങള്‍ തകര്‍ക്കാന്‍ നീക്കം നടന്നതായി പൊലിസ്

Summary: The US Embassy in Saudi Arabia was targeted by a suspected Iranian drone attack earlier this week, with reports indicating that the CIA station located within the mission was hit. Two drones struck the embassy compound in Riyadh, sparking a fire and prompting Washington to issue an urgent directive for American citizens to evacuate all West Asian nations from Egypt eastward.

US President Donald Trump confirmed that while the initial military projections for the conflict were four to five weeks, the United States is fully equipped for a prolonged engagement. He vowed to retaliate 'soon' for the strikes on diplomatic missions.