ദുബൈ: വരാനിരിക്കുന്ന യു.എ.ഇയുടെ നീണ്ട ദേശീയ ദിന അവധിയില്‍ യു.എ.ഇ നിവാസികള്‍ വിസാ രഹിത രാജ്യങ്ങളിലേക്കുള്ള വിമാന ടിക്കറ്റ് നിരക്കില്‍ 300 ശതമാനം അധികം നല്‍കേണ്ടി വരുമെന്ന് റിപ്പോര്‍ട്ട്. നവംബര്‍ 30 മുതല്‍ ഡിസംബര്‍ 3 വരെയുള്ള യു.എ.ഇയുടെ ദേശീയ ദിന അവധിക്കാലത്ത് ജോര്‍ജിയ, അസര്‍ബൈജാന്‍, തായ്‌ലാന്‍ഡ്, അര്‍മേനിയ, മാലിദ്വീപ് തുടങ്ങിയ ജനപ്രിയ വിസാ രഹിത ലക്ഷ്യ സ്ഥാനങ്ങളിലേക്കാണ് വിമാന നിരക്കുകളില്‍ ഗണ്യമായ വര്‍ധനയുണ്ടാവാന്‍ പോകുന്നതെന്നും ഈ മേഖലയിലെ വിദഗ്ധരെയും ടൂറിസ്റ്റുകളെയും ഉദ്ധരിച്ചുള്ള റിപ്പോര്‍ട്ടില്‍ ചുണ്ടിക്കാട്ടി.

ദേശീയ ദിനാവധിയില്‍ വന്‍ തോതില്‍ ആളുകള്‍ ഈ സ്ഥലങ്ങളിലേക്ക് പോകുന്നതിനാല്‍, ഡിമാന്‍ഡിലെ കുതിച്ചുചാട്ടവും പരിമിതമായ സീറ്റ് ലഭ്യതയും നിരക്ക് വര്‍ധനക്ക് ആക്കം കൂട്ടുന്നുവെന്ന് ട്രാവല്‍ ഏജന്‍സി വൃത്തങ്ങള്‍ പറഞ്ഞു. യാത്രാ വിദഗ്ധരുടെ കണക്കുകള്‍ പ്രകാരം, സാധാരണ ഗതിയില്‍ ഏകദേശം 800 ദിര്‍ഹമുള്ള റൗണ്ട് ട്രിപ് ടിക്കറ്റുകള്‍ ചില ലക്ഷ്യസ്ഥാനങ്ങളിലേക്ക് 2,800 ദിര്‍ഹമായി ഉയര്‍ന്നു.  അനേകം യു.എ.ഇ നിവാസികള്‍ ഏറ്റവും ആവശ്യപ്പെടുന്ന യാത്രാ കാലയളവാണ് ദേശീയ ദിന അവധി. അവരില്‍ പലരും ദിനചര്യയില്‍ നിന്ന് രക്ഷപ്പെടാനും അടുത്തുള്ള വിസ രഹിത രാജ്യങ്ങള്‍ പര്യവേക്ഷണം ചെയ്യാനും ആഗ്രഹിക്കുന്നു. 

ജോര്‍ജിയയിലേക്കുള്ള വണ്‍ വേ യാത്ര നിലവില്‍ ബജറ്റ് വിമാന കമ്പനികള്‍ക്ക് 269 ദിര്‍ഹം മുതല്‍ ആരംഭിക്കുന്നു. റൗണ്ട് ട്രിപ് ഏകദേശം 800 ദിര്‍ഹം മുതലാണ് തുടങ്ങുന്നത്. ദേശീയ ദിന അവധിക്കാലത്ത്, അതേ എയര്‍ലൈനിലെ വിമാന നിരക്ക് വണ്‍വേ ടിക്കറ്റിന് 289 രൂപ, നാലു ദിവസത്തെ അവധിക്ക് 2,828 ദിര്‍ഹം വരെയായി  നിരക്ക് വര്‍ധിക്കുന്നു.

അതുപോലെ, ബാക്കു (അസര്‍ബൈജാന്‍), യെരേവാന്‍ (അര്‍മേനിയ) എന്നിവിടങ്ങളില്‍ വിമാന നിരക്ക് നിലവില്‍ 167 ദിര്‍ഹം മുതല്‍ ആരംഭിക്കുന്നു. റൗണ്ട് ട്രിപ് 689 ദിര്‍ഹമാണ്. എന്നാല്‍, അടുത്ത നീണ്ട വാരാന്ത്യത്തില്‍, വിമാനക്കൂലി കുതിച്ചുയരുന്നു. വണ്‍ വേ 1,607 ദിര്‍ഹമും മടക്ക യാത്രയ്ക്ക് 2,634 ദിര്‍ഹമാണ്. മാലിദ്വീപിലേക്ക് നിലവിലെ വിമാന നിരക്ക് 449 ദിര്‍ഹം മുതല്‍ ആരംഭിക്കുന്നു.
 റൗണ്ട് ട്രിപ് നിരക്ക് 1,500 ദിര്‍ഹമാണ്. എന്നാല്‍, ദേശീയ ദിന അവധിക്കാലത്ത് പല ട്രാവല്‍ വെബ്‌സൈറ്റുകളും വിലയില്‍ ഏകദേശം 70 ശതമാനം വര്‍ധന കാണിക്കുന്നു. ഈ അവധിക്കാലത്ത് ഒരു റൗണ്ട് ട്രിപ്പിനുള്ള വിമാന നിരക്ക് 2,229 ദിര്‍ഹം മുതല്‍ ആരംഭിക്കും.