മുംബൈ: മുംബൈയിലെ വെര്‍സോവ ബീച്ചില്‍ ഉറങ്ങിക്കിടന്നവരുടെ മേല്‍ വാന്‍ പാഞ്ഞു കയറി ഒരു മരണം. അമിതവേഗത്തില്‍ വന്ന വാന്‍ കയറി മറ്റൊരാള്‍ക്ക് ഗുരുതരമായി പരിക്കേല്‍ക്കുകയും ചെയ്തിട്ടുണ്ട്.

റിക്ഷാ ഡ്രൈവറായി ജോലി ചെയ്തിരുന്ന ഗണേഷ് യാദവ് (36) ആണ് മരിച്ചത്. കൂടെയുണ്ടായിരുന്ന ബബ്‌ലു ശ്രീവാസ്തവയെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചിരിക്കുകയാണ്. 

കാര്‍ ഡ്രൈവര്‍ നിഖില്‍ ജാവ്‌ലെ , സുഹൃത്ത് ശുഭം ഡോങ്‌ഗ്രെ എന്നിവരെ പൊലിസ് അറസ്റ്റ് ചെയ്തു. പ്രാദേശിക കോടതിയില്‍ ഹാജരാക്കിയ ഇവരെ അഞ്ച് ദിവസത്തെ ജുഡീഷ്യല്‍ കസ്റ്റഡിയില്‍ വിട്ടു. 

അപകടം നടന്ന സമയത്ത് ഇവര്‍ കാറില്‍ നിന്ന് ഇറങ്ങിയതായും എന്നാല്‍ കാര്‍ കയറിയവര്‍ പ്രതികരണമില്ലാതെ കിടക്കുന്നത് കണ്ട് സ്ഥലം വിട്ടതായും ദൃക്‌സാക്ഷികള്‍ പറയുന്നു. സംഭവസമയത്ത് ഇവര്‍ മദ്യപിച്ചിരുന്നോ എന്നറിയാന്‍ ഇവരുടെ രക്തസാമ്പിളുകളും പൊലിസ് പരിശോധനയ്ക്ക് അയച്ചിട്ടുണ്ട്.