കോഴിക്കോട്: ലോക്‌സഭാ തെരഞ്ഞെടുപ്പിൽ വടകര മണ്ഡലത്തിൽ യു.ഡി.എഫ് സ്ഥാനാർഥിക്കെതിരേ എൽ.ഡി.എഫ് ആയുധമാക്കിയ 'കാഫിർ'സ്‌ക്രീൻ ഷോട്ടിന് പിന്നിൽ ഇടത് സൈബർ ഗ്രൂപ്പുകളാണെന്ന പൊലിസ് റിപ്പോർട്ടിൽ കുടുങ്ങി സി.പി.എം. വ്യാജ സ്‌ക്രീൻ ഷോട്ട് ആദ്യം പ്രചരിപ്പിച്ചത് ഡി.വൈ.എഫ്.ഐ വടകര ബ്ലോക്ക് കമ്മിറ്റി പ്രസിഡന്റ് റിബേഷ് രാമകൃഷ്ണനാണെന്ന റിപ്പോർട്ടിലെ പരാമർശവും സി.പി.എം നേതൃത്വത്തെ വെട്ടിലാക്കി.

അതേസമയം, മുൻ എം.എൽ.എ കെ.കെ ലതിക സ്‌ക്രീൻ ഷോട്ട് ഷെയർ ചെയ്തത് തെറ്റായ നടപടിയാണെന്ന വടകരയിലെ എൽ.ഡി.എഫ് സ്ഥാനാർഥിയായിരുന്ന കെ.കെ ശൈലജയുടെ പരാമർശവും സി.പി.എമ്മിന് തലവേദനയാവുകയാണ്. വ്യാജ സ്‌ക്രീൻ ഷോട്ട് പ്രചരിച്ചത് ഉന്നത സി.പി.എം നേതാക്കളുടെ അറിവോടെയാണെന്ന ആരോപണമാണ് യു.ഡി.എഫ് നേതാക്കൾ ഉയർത്തുന്നത്.

എൽ.ഡി.എഫ് സ്ഥാനാർഥിയെ 'കാഫിർ' എന്ന് വിശേഷിപ്പിച്ചുള്ള ഈ സന്ദേശത്തെ ചൊല്ലിയുള്ള ആരോപണ, പ്രത്യാരോപണങ്ങൾ സംസ്ഥാന തലത്തിൽ തന്നെ ചർച്ചയായി. എന്നാൽ എൽ.ഡി.എഫ് നിർമിച്ച വ്യാജ സന്ദേശമാണ് ഇതെന്ന് യു.ഡി.എഫ് ആരോപിച്ചു. തന്റെ പേരിൽ പ്രചരിക്കുന്ന സ്‌ക്രീൻഷോട്ട് വ്യാജമാണെന്നും യഥാർഥ പ്രതികളെ പിടികൂടണമെന്നും ആവശ്യപ്പെട്ട് മുഹമ്മദ് ഖാസിം പരാതി നൽകിയതോടെയാണ് കേസ് വഴിത്തിരിവിലെത്തിയത്. അന്വേഷണത്തിന്റെ ഭാഗമായി പൊലിസ് ഖാസിമിന്റെ ഫോൺ പരിശോധിച്ചിരുന്നു. സംഭവത്തിൽ ഖാസിമിന്റെ പങ്ക് തെളിയിക്കുന്ന ഒന്നും പൊലിസിന് കണ്ടെത്താൻ കഴിഞ്ഞില്ല. പൊലിസ് അന്വേഷണം എങ്ങുമെത്താതായതോടെ ഖാസിം ഹൈക്കോടതിയെ സമീപിക്കുകയായിരുന്നു. തുടർന്ന് ഹൈക്കോടതി ആവശ്യപ്പെട്ടതുപ്രകാരം പൊലിസ് നൽകിയ സത്യവാങ്മൂലത്തിൽ ഖാസിം നിരപരാധിയാണെന്ന് വ്യക്തമാക്കി. എന്നാൽ സ്‌ക്രീൻ ഷോട്ടിന്റെ ഉറവിടം കണ്ടെത്താനായില്ല.

ഇടത് സൈബർ ഗ്രൂപ്പുകളിലാണ് ആദ്യം സന്ദേശം വന്നതെന്ന് തെളിഞ്ഞിട്ടും പൊലിസ് നിഷ്‌ക്രിയത്വം കാണിക്കുകയാണെന്ന് യു.ഡി.എഫ് ആരോപിക്കുന്നു.

കണ്ടെത്തലിന് പിന്നാലെ എസ്.പിക്ക് സ്ഥലംമാറ്റം

കോഴിക്കോട്: വ്യാജ 'കാഫിർ' സ്‌ക്രീൻഷോട്ടിന്റെ അന്വേഷണത്തിൽ നിർണായക വിവരങ്ങൾ കണ്ടെത്തിയതിന് പിന്നാലെ എസ്.പിക്ക് സ്ഥലംമാറ്റം. വടകര റൂറൽ എസ്.പി ഡോ. അരവിന്ദ് സുകുമാറിനെയാണ് തിരുവനന്തപുരത്തെ സാമ്പത്തിക കുറ്റാന്വേഷണ വിഭാഗം എസ്.പിയായി സ്ഥലംമാറ്റിയത്. ആഭ്യന്തരവകുപ്പിന്റെ പൊതു സ്ഥലംമാറ്റമാണെങ്കിലും എസ്.പിയെ നിർണായക ഘട്ടത്തിൽ സ്ഥലംമാറ്റിയത് ചർച്ചയായിട്ടുണ്ട്.

വടകര എസ്.എച്ച്.ഒ എൻ.സുനിൽകുമാറാണ് കേസിൽ അന്വേഷണം നടത്തുന്നത്. എസ്.പിയുടെ മേൽനോട്ടത്തിലായിരുന്നു ഇതുവരെ അന്വേഷണം നടന്നത്. കേസിൽ ഏറെ നിർണായകമായ വിവരങ്ങളാണ് പൊലിസിന് ലഭിച്ചത്. അന്വേഷണം പുരോഗിക്കവെയാണ് എസ്.പിയെ സ്ഥലംമാറ്റിയിരിക്കുന്നത്. പി. നിധിൻരാജാണ് പുതിയ എസ്.പി.

കേസുമായി മുന്നോട്ടുപോകും: മുഹമ്മദ് ഖാസിം 

കോഴിക്കോട്: വടകരയിൽ വോട്ടിനു വേണ്ടി സി.പി.എം കഴിഞ്ഞകാലങ്ങളിലൊക്കെ നടത്തിവരുന്ന വർഗീയ ധ്രുവീകരണത്തിന്റെ ചെറിയ ഉദാഹരണം മാത്രമാണ് ഇപ്പോൾ തെളിഞ്ഞതെന്ന് കേസിൽ നിരപരാധിയാണെന്ന് പൊലിസ് കണ്ടെത്തിയ എം.എസ്.എഫ് നേതാവ് മുഹമ്മദ് ഖാസിം പറഞ്ഞു. ഹൈക്കോടതിയിൽ കേസുമായി മുന്നോട്ടു പോകാനാണ് തീരുമാനം. പ്രതികളെന്ന് കണ്ടെത്തിയവരെ പോലും പൊലിസ് സാക്ഷികളായാണ് ഉൾപ്പെടുത്തുന്നത്. പൊലിസ് നൽകിയ സത്യവാങ്മൂലത്തിൽ മേൽവിലാസം പോലും കൃത്യമായി രേഖപ്പെടുത്തിയിട്ടില്ല. നാലുതവണ ഈ കേസുമായി ബന്ധപ്പെട്ട് പരാതി നൽകിയിട്ടും പൊലിസ് നടപടിയെടുത്തില്ല. ഒടുവിൽ ഹൈക്കോടതി ഇടപെട്ടതോടെയാണ് പൊലിസ് പോരാളി ഷാജി അടക്കമുള്ളവർക്കെതിരെ റിപ്പോർട്ട് നൽകിയതെന്നും ഖാസിം പറഞ്ഞു.

A police report implicates CPM's cyber groups in the circulation of a fake 'Kafir' screenshot used against the UDF candidate in Vadakara during the Lok Sabha elections. SP Aravind Sukumaran is transferred,The controversy has sparked intense debate and legal scrutiny.